Qazaqstanda apattyq jaǵdaıda turǵan 126 munaı uńǵymasy jabylady

ASTANA. QazAqparat - Qazaqstanda 2019 jylǵa deıin Kaspıı teńiziniń astynda qalýy yqtımal apattyq jaǵdaıdaǵy 126 munaı jáne gaz kenishteri jabylatyn bolady. Bul týraly «QazAqparat» agenttiginiń resmı saýalyna QR Energetıka mınıstrligi habarlady.

«QR Úkimetiniń 2014 jylǵy 21 mamyrda bekitilgen №526 qaýylysymen bekitilgen, «QR-nyń 2015-2019 jyldarǵa arnalǵan geologııalyq barlaý jumystarynyń baǵdarlamasyna» sáıkes, eń aldymen Kaspıı teńiziniń astynda qalýy múmkin oqshaýlaý jáne joıý boıynsha jedel sharalardy talap etetin, qurlyqtaǵy óte joǵary apattyq jaǵdaıda turǵan munaı jáne gaz uńǵymalaryn joıý jáne konservatsııalaý kózdelgen.
2010 jyly QR IDM Geologııa jáne jer qoınaýyn paıdalaný komıtetiniń júrgizgen zertteýlerdiń nátıjesi boıynsha, Kaspıı teńiziniń astynda qalýy yqtımal apattyq jaǵdaıdaǵy 126 munaı jáne gaz kenishteri jabylatyn bolady», - delingen habarlamada.  
Jospar boıynsha, 2015 jyly 10 uńǵyma, 2016 jyly - 20, 2017 jyly 30, 2018 jyly 40, 2019 jyly - 26 uńǵyma oqshaýlanýy tıis. 
Bunyń aldynda, 2004-2009 jyldary Kaspıı teńiziniń sý basqan jerlerinde ornalasqan 47 munaı uńǵymasy jabylǵan. 
Esterińizge sala keteıik, 2013 jyly QR QOQM Ekologııalyq retteý jáne baqylaý komıteti tóraǵasynyń orynbasary Jomart Álıev Kaspıı qaırańynan 1 900 munaı jáne gaz uńǵymalary tabylǵandyǵyn habarlaǵan bolatyn. Olardyń jartysy apattyq jaǵdaıy qaýipti sanatta bolǵan.  Eń aldymen solar jabylyp, oqshaýlandy. Memleket olardy konservatsııalaý jáne joıý boıynsha barlyq jumystardy júrgizdi. Birinshi memlekettik baǵdarlamany júzege asyrý kezeńinde 99 uńǵyma joıyldy.