Qazaqstanda apatty jaǵdaıdaǵy 6 sý qoımasy jóndeledi
Bul týraly QR Ekologııa, geologııa jáne tabıǵı resýrstar mınıstrligi Sý resýrstary komıteti tóraǵasynyń orynbasary Dosbol Bekmaǵambetov aıtyp berdi, dep habarlaıdy QazAqparat tilshisi.
«El boıynsha apatty jaǵdaıdaǵy 41 sý qoımasynyń 16-sy qalpyna keltirildi. Nátıjesinde halyq sany 120 myń adamnan asatyn 16 aýyldyq eldimekendi sý basý qaýpi joıyldy. Bıyl taǵy 6 sý qoımasyn qalpyna keltirý jumystary júrgizilýde. Qalǵan 19-y 2025 jyldyń sońyna deıin jóndeledi», - dedi Dosbol Bekmaǵambetov Ortalyq kommýnıkatsmııalar qyzmetinde tilshilerdiń suraǵyna.
Onyń aıtýynsha, 2025 jylǵa deıin qosymsha sý kólemin qamtamasyz etý úshin jınaqtaý kólemi 1,7 tekshe kılometr bolatyn 9 jańa sý qoımasy jobasyn iske asyrý josparlanǵan. Onyń ishinde 59,4 mlrd teńgege: Aqmola – 1, Almaty oblysy – 1, Jambyl – 3, Batys Qazaqstan – 2, Qyzylorda – 1, Túrkistan obylsynda – 1 qoımadan salynbaq.
2021 jyly qurylys-montajdaý jumystary aıaqtalyp, kólemi 18,5 mln m3 «Keńsaı-Qosqorǵan-2» sý qoımasy paıdalanýǵa berilgen.
«2022-2023 jyldary 6 jobalyq smetalyq qujattardy ázirleýdi aıaqtaý josparlanýda, bul jalpy kólemi 1,6 km m3 bolatyn Yrǵaıty, Aqmola, Qalǵuty, Úlken Ózen, Buzylyq, Qaraózek jáne Kishi Ózen sý qoımalary. 2023 jyly osy atalǵan qoımalardyń qurylysy bastalady. Jalpy atalǵan jobalardy iske asyrý 70 eldimeken men 137 myń adam úshin sý tasqyny qaýpin azaıtady jáne kórshiles Qyrǵyzstan, Ózbekstan jáne Reseıge sý táýeldiligin tómendetedi», - dedi spıker.
Buǵan deıin Dosbol Bekmaǵambetov Qazaqstanda 2030 jylǵa qaraı sý resýrstarynyń tapshylyǵy 23,2 tekshe kılometrge jetýi múmkin ekenin aıtqan edi.
Eldiń shyǵys óńiri sý resýrstarymen anaǵurlym kóbirek qamtamasyz etilse, ortalyq Qazaqstan eń az qamtylǵan. Ońtústik jáne Batys óńirler shekaralas elderge táýeldi bolyp otyr.
