Qazaqstanda apatty kúıdegi qansha úı bar - mınıstr jaýaby

ASTANA. QazAqparat - Indýstrııa jáne ınfraqurylymdyq damý mınıstri Marat Qarabaev apatty jaǵdaıdaǵy turǵyn úılerge qatysty sońǵy málimetpen bólisti, dep habarlaıdy QazAqparat tilshisi.

«Respýblıka boıynsha tozyǵy jetken jáne apatty jaǵdaıdaǵy 3 700 úı bar. Bıyl apatty jaǵdaıdaǵy turǵyn úıler máselesi qaıta qaralady. Sonymen qatar qalalardyń sáýlettik kelbetin jaqsartý maqsatynda súriletin úılerdiń tizimi jasalady. Jalpy 2029 jylǵa deıin 1 500 úıdi buzý jáne 40 myń azamattyń turǵyn úı máselesin sheshýdi qamtamasyz etý josparlanyp otyr», - dedi Marat Qarabaev Úkimet otyrysynda.

Mınıstrdiń aıtýynsha, turǵyn úı qurylysyna quıylatyn ınvestıtsııa kólemi artyp keledi.

«2022 jyldyń qorytyndysy boıynsha elimizde 15 mln 400 myń sharshy metr turǵyn úı paıdalanýǵa berildi. ıAǵnı 130 myńnan astam turǵyn úı salyndy.

Turǵyn úı qurylysyna ınvestıtsııa ótken jylmen salystyrǵanda 16,8 % artyp, 2 trln 900 mlrd teńgeni qurady. Memlekettik ınvestıtsııalar esebinen 17 300 páter salynyp, 10 500 jeńildetilgen nesıe berildi», - deıdi ol.

Odan ári vedomstvo basshysy turǵyn úılerdiń sý jáne jylý júıelerin qaıta jóndeý jumysyna toqtaldy.

«Elimiz boıynsha sý, jylý jelileriniń jalpy uzyndyǵy 129 myń shaqyrymdy quraıdy. Ótken jyldyń qorytyndysy boıynsha túrli qarjylandyrý kózi esebinen 3 myń shaqyrymǵa jýyq sý jáne jylý jelisi qaıta jóndeýden ótti. Nátıjesinde jelilerdiń jalpy tozýy 53 paıyzdan 51 paıyzǵa deıin tómendedi. Atalǵan kórsetkishti 50% deıin tómendetýdi josparlap otyrmyz», -dedi M. Qarabaev.