Qazaqstanda turǵyn úılerdi renovatsııalaýdyń jańa tetigi iske qosyldy
ASTANA. KAZINFORM – Qazaqstanda apatty jáne tozyǵy jetken turǵyn úılerdi renovatsııalaýdyń jańa naryqtyq tetigi iske qosyldy. Ol Biryńǵaı turǵyn úı qurylysy operatorynyń kepildikteri arqyly jeke ınvestıtsııalardy tartýǵa jáne turǵyndardyń quqyqtaryn qorǵaýǵa múmkindik beredi.
Ónerkásip jáne qurylys mınıstrligi ókiliniń aıtýynsha, zamanaýı ýrbanızatsııa jaǵdaıynda renovatsııalaý baǵdarlamalary qala qurylysy, sáýlettik damý jáne ınvestıtsııa tartý baǵyttarymen ózara sabaqtas júrgizilýge tıis.
— Jergilikti atqarýshy organdardyń málimetinshe, elimizde shamamen 4,2 myń tozyǵy jetken jáne apatty kóppáterli turǵyn úı tirkelgen. Aldyn ala baǵalaýlarǵa qaraǵanda, apatty jáne eski turǵyn úılerdiń barlyq menshik ıesin kóshirý úshin shamamen 3,2 trln teńge kóleminde ınvestıtsııa qajet. Osyǵan baılanysty renovatsııalaýdyń tıimdi tetikterin iske asyrý, jeke ınvestıtsııalardy tartý jáne qalalyq ortany damytýdyń zamanaýı tásilderin engizý qurylys jáne ýrbanızatsılaý salasyndaǵy memlekettik saıasattyń negizgi mindetteriniń birine aınalyp otyr, — dedi QR Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Qanat Myńbaev Ortalyq kommýnıkatsııalar qyzmetinde ótken brıfıngte.
Osy maqsatta Jer jáne Qurylys kodeksterine, sondaı-aq «Turǵyn úı qatynastary týraly», «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» jáne «Turǵyn úı qurylysyna úlestik qatysý týraly» zańdarǵa ózgerister men tolyqtyrýlar engizildi. Sonymen qatar Biryńǵaı operatordyń kepildikterin paıdalana otyryp, renovatsııalaýdyń jańa naryqtyq tetigin iske asyratyn zańǵa táýeldi normatıvtik quqyqtyq aktiler qabyldandy.
— Qabyldanǵan túzetýler renovatsııalaýdy iske asyrýdyń qosymsha naryqtyq quralyn qalyptastyrady. Bul tetik turǵyn úı qurylysyna úlestik qatysý týraly zańnama aıasynda Biryńǵaı turǵyn úı qurylysy operatorynyń kepildikterin qoldaný arqyly qurylys salýshylardyń, ıaǵnı ınvestorlardyń qatysý múmkindigin kózdeıdi, — dedi komıtet tóraǵasynyń orynbasary.
Onyń sózinshe, jańa tetikti engizýdiń negizgi artyqshylyqtary — Biryńǵaı operatordyń kepildigi arqyly turǵyndardyń quqyqtaryn tolyq qorǵaý, jeke ınvestıtsııalardy yntalandyrý, memlekettik bıýdjetke túsetin júktemeni azaıtý jáne turǵyn úı qoryn zamanaýı standarttarǵa saı jańartý.
Sondaı-aq spıker renovatsııalaý jobalaryn iske asyrýda ákimdikterdiń róli erekshe ekenin aıtty.
— Naryqtyq tetikti tabysty iske asyrý úshin ákimdikter turǵyn úılerdi pasporttaý nátıjeleri negizinde egjeı-tegjeıli josparlaý jobalaryn (ETJ) ýaqtyly ózektendirýdi eskerýi qajet, óıtkeni qoldanystaǵy zańnamaǵa sáıkes turǵyn úıdi renovatsııalaý tek bekitilgen qala qurylysy jobalary sheńberinde júzege asyrylady, — dedi Qanat Myńbaev.
Onyń aıtýynsha, osy tapsyrmany oryndaý maqsatynda jergilikti atqarýshy organdar 2025 jyly apatty jáne tozyǵy jetken turǵyn úılerdi buzý arqyly olardyń menshik ıelerin 2029 jylǵa deıin jańa turǵyn úımen qamtamasyz etý jónindegi jol kartalaryn qaıta bekitken.
Aıta keteıik, Astanada renovatsııaǵa jatatyn 178 úı bar.
