Qazaqstanda antıbıotıkterdi orynsyz qabyldaý máselesin retteý usynyldy

NUR-SULTAN. QazAqparat – «Bıologııalyq qaýipsizdik problemalary ǵylymı-zertteý ınstıtýty» ShJQ RMK Bas dırektory Kúnsulý Zakarıa elimizde antıbıotıkterdi orynsyz qabyldaýdyń zııanyn aıtty, dep habarlaıdy QazAqparat tilshisi.

Onyń paıymynsha, asa qaýipti aýrýlardyń qateri men jańa ınfektsııalardyń paıda bolýy indettiń aldyn alý nemese olardyń saldaryn barynsha tómendetýge baǵyttalǵan júıeli sharalardy qabyldaýdy talap etedi.

«Sarapshylardyń pikirine qaraǵanda, birqatar asa qaýipti aýrýlar jahandaný men halyqtyń belsendi kóshi-qony, jabaıy janýarlar men qustardyń mıgratsııasyna baılanysty. Osy oraıda aýrýlar jańa aýmaqtarda tez taraıdy. Sondyqtan asa qaýipti patogenderdiń aldyn alý nemese saldaryn tómendetý úshin júıeli túrde túrli sıpattaǵy bıologııalyq qaterdiń monıtorıngin júrgizip, boljaý jumystaryn iske asyrǵan jón», - dedi Kúnsulý Zakarıa Májilistegi dóńgelek ústel otyrysynda.

Bul turǵyda ǵalym otandyq bıopreparattar men dári-dármekti, sondaı-aq qorǵanys quraldaryn óndirýdi arttyrý óte mańyzdy ekenin atap ótti.

«Qazirgi kezde antıbıotıkterdi qadaǵalaýsyz qabyldaýdy retteý máselesi ózekti bolyp tur. Bıologııalyq qaýipsizdiktiń barlyq máseleleri úshin jalpy úılestirý kúsh-jigerin aıqyndaý kerek», - dedi K. Zakarıa.

Onyń sózine qaraǵanda, antıbıotıkke tózimdi mıkroaǵzalardyń paıda bolýyn tómendetý úshin medıtsına men aýyl sharýashylyǵynda antıbıotıkterdi qabyldaýdy retteý qadamdaryn engizý kerek.

Budan buryn habarlanǵandaı, Májiliste bıologııalyq qaýipsizdik máselelerin talqylaýǵa arnalǵan dóńgelek ústel otyrysy ótip jatyr.