Qazaqstanda ánshiler emes, muǵalimder juldyz boldy - Murat Ábenov
Onyń aıtýynsha, jańa júıege aýysý balalarǵa emes, ata-anaǵa qıyn soqqan tárizdi.
«Qazir nemerem 1 synypta oqyp júr. Meniń baıqaǵanym, smartfon ustap ósken qazirgi balalar bul júıede kóp qınalǵan joq. Balalarǵa jańa tehnologııa jaqyn, olarǵa telefon - qolynyń jalǵasy sııaqty. Munda bala emes, ata-analar kóbirek qınalǵan sııaqty. Biraz ata-ananyń tsıfrlyq saýaty tómen ekeni kórindi. Jalpy balalardyń ata-anasynan ozyp ketkenin kóremiz», - dedi M. Ábenov «Qashyqtan oqytý - oqýshylar men ata-analar úshin jańa tájirıbe» atty onlaın-konferentsııasynda.
Sonymen birge, spıker Bilim jáne ǵylym mınıstrligi ınternet máselesin utymdy sheshkenin baǵalady.
«Bilim mınıstrligi bul problemany utymdy sheshýge tyrysty. Qaı jerde ınternet bar, sonda ǵana qosý kerek. Sosyn teledıdar arqyly bilim berý de máseleni sheshti. Bul Qytaıdyń tájirıbesinde bar. 1980 jyldary bilimdi kóterý kezinde alystaǵy aýyldarǵa ustaz tabylmaǵan soń, olar teledıdardy paıdalandy. Teledıdar júıesi óte arzan. Internet qajet etpeıdi. Teledıdardy ary qaraı oqytý júıesin jalǵastyrý qajet», - dedi qoǵam qaıratkeri.
Onyń aıtýynsha, qashyqtan oqytý júıesi barlyǵyn ádil baǵalaýǵa múmkindik berip jatyr. Bir jaǵynan ınfraqurylym nasharlyǵy kórinse, ekinshi jaǵynan eń talantty azamattar tanyldy, baıqalmaı júrgen jobalar alǵa shyqty.
«Serpin» baǵdarlamasy arqyly aǵylshyn tilin oqytý babymen Anglııaǵa barǵan edik. Sonda qashyqtan oqytý boıynsha birshama qalyp qoıǵanymyz baıqaldy. Qazir amaldyń joqtyǵynan osy júıege aýysýǵa májbúr boldyq. Sondyqtan, qashyqtan oqytý júıesi parallel júıe retinde qalýy kerek. Bul - óte jaqsy ádis, úırenip alǵan soń ony toqtatýdyń qajeti joq. Kerisinshe, óńirlerde shaǵyn mektepterge kerek. Ol jerge fızıka, ınformatıka muǵalimderi joq. Sondyqtan, qashyqtan oqytý arqyly búkil Qazaqstanǵa sabaq beretin talantty azamattardy taýyp, teledıdar, ıntenet arqyly alystaǵy mektepterge sabaq bere alamyz», - dedi M. Ábenov.
Sondaı-aq, spıker ustazdardyń qoǵamdaǵy belsendiligi asa mańyzdy ekenin atap ótti.
«Osy ýaqytqa deıin elimizde ánshiden bastap, ázilqoılarǵa deıin túrli juldyzdar boldy. Endi Qazaqstanda muǵalimder juldyz bolady. Arnaıy zań qabyldandy, jalaqy 25 paıyzǵa kóterildi, ata-analar muǵalimderdiń eren eńbegin túsinip jatyr. Qazir qansha adam ekran arqyly myqty ustazdardy kóredi, kóshede tanıdy, balalarynyń esimin yrymdap qoıady. Qaı qoǵamda ustaz «juldyz» bolsa, qurmetti bolsa, sol qoǵam alǵa shyǵady. Eger muǵalimder ınternetke shyqsa, saıası-qoǵamdyq belsendiligi artady, óz quqyqtaryn talap etedi. Dál osy qarqynmen bir jyldan keıin muǵalimder óte belsendi bolyp shyǵady. Bizge belsendi, óz quqyǵyn talap ete alatyn, ózin qorǵaı alatyn muǵalimder qajet. Sondaı muǵalimder balalarǵa azamattyq qasıet úıretedi dep oılaımyn», - dedi Murat Ábenov.
