Qazaqstanda «Ańsaǵan sábı» baǵdarlamasynyń nátıjesinde 7000-nan astam sábı dúnıege keldi
ASTANA. KAZINFORM - Úkimette «Ańsaǵan sábı» jobasynyń júzege asý barysy qaraldy. QR Premer-Mınıstriniń orynbasary Tamara Dúısenova baǵdarlamanyń basy-qasynda júrgen reprodýktolog mamandarmen, qoǵam belsendilerimen jáne Densaýlyq saqtaý mınıstrliginiń ókilderimen kezdesti. Bul týraly Úkimettiń baspasóz qyzmeti habarlady.
Memleket basshysynyń tapsyrmasymen júzege asyp kele jatqan baǵdarlama arqyly 7 myńnan asa náreste dúnıege kelgen bolatyn. «EKOMED» adam reprodýktsııasy klınıkalar tobynyń ǵylymı jetekshisi Saltanat Baıqoshqarova bala súıýdi ańsaǵan azamattar arasynda oǵan suranys artyp kele jatqanyn jetkizdi.
«Densaýlyq saqtaý mınıstrligimen tyǵyz qarym-qatynasta atqarylǵan jumystardyń nátıjesinde birqatar máseleler sheshimin tapty. Óz kezegin kútken juptar qazir burynǵydan qaraǵanda kvotaǵa jyldamyraq qol jetkizetin boldy. Reprodýktologııa salasy qarqyndy damyp keledi. Sońǵy kezderi embrıondardy kreokonservatsııalaýdyń arqasynda ekstrakorporaldy uryqtandyrý ádisiniń nátıjeliligi artty», - dedi Saltanat Baıqoshqarova.
Ekstrakorporaldy uryqtandyrý isinde qoǵamdyq uıymdar da at salysýda. Máselen, «Mariyam» qaıyrymdylyq qorynyń kómegimen 10 cəbı dúnıege kelgen. Uıymnyń qamqorshylyq keńesiniń tóraıymy Láılá Sultanqyzy jobany odan ári jetildirýge bolady degen paıymda. Bul rette sala mamandarymen birlese otyryp, birqatar usynysty ortaǵa saldy.
Qazirgi ýaqytta elimizde jasandy uryqtandyrý isimen 31 ortalyq aınalysady. Onyń 19-y mindetti áleýmettik medıtsınalyq saqtandyrý júıesiniń sheńberinde qyzmet kórsetýde. Olarǵa qarastyrylǵan kvotalardy bólý tártibin qaıta qarastyrý usynyldy. Sondaı-aq ekstrakorporaldy uryqtandyrý sharasyna ketetin shyǵyndardy qaıta qaraý, tıisti aqparattyq júıeler arasyndaǵy ıntegratsııany kúsheıtý jaǵy sóz boldy. Tamara Dúısenova usynystarǵa baılanysty Densaýlyq saqtaý mınıstrligine tıisti tapsyrmalar berdi. Sondaı-aq vıtse-premer máseleniń saldarymen qatar, sebebimen júıeli jumys qajet ekenin atap ótti. Resmı derekke saı, elimizde 4 myńnan astam er azamatqa jáne 29 myńnan asa áıel adamǵa bedeýlik dıagnozy qoıylǵan.
«Eń aldymen jasóspirimder, ata-analardyń, jalpy halyq arasynda salamatty ómir saltyn ustanýǵa baılanysty aqparattyq-nasıhat jumysy kúsheıtilýi shart. Qajetti medıtsınalyq profılaktıkalyq tekserý sharalarymen qamtý mańyzdy. Bir sózben aıtqanda, deni saý urpaq tárbıeleý úshin keseldiń aldyn alýǵa kúsh salýymyz qajet. Adam aǵzasynda patologııa anyqtalǵan jaǵdaıda erte bastan alǵashqy kómek berý júıeli júrgizilýi kerek», - dep atap ótti Tamara Dúısenova.
