Qazaqstanda anestezıologtar men reanımatologtar tapshy
QR Anestezıologtary men reanımatologtary qoǵamynyń tóraǵasy Aǵzam Jumadilovtyń aıtýynsha, Astana men Almatyda osy sanattaǵy mamandardyń tapshylyǵy baıqalmaıdy. Biraq aýdandyq aýrýhanalarda anestezıologtar men reanımatologtar óte az. Sebebi joǵary oqý oryndaryn bitiretin jas mamandar jergilikti jerge barǵysy kelmeıdi. «Shyny kerek, qazirgi kezde anestezıologtar men reanımatologtardyń tapshylyǵy barynsha baıqalady. Osy sanattaǵy mamandar jumysty jıi aýystyrady. Olardyń biliktiligin arttyrýǵa arnalǵan sharalar az. Jalpy, bul mamandyqtyń mártebesi túsip ketti. Jalaqysy tómen. Qural-jabdyqtarmen qamtamasyz etý jaǵy álsiz. Medıtsınalyq preparattardyń jetispeýshiligi de bar. Jergilikti jerde narkoz beretin apparattardyń tehnıkalyq jaǵdaıy syn kótermeıdi. Respıratorlar eskirdi. Osy máselelerdiń bárin sheshý kerek. Al anestezıologtar men reanımatologtardyń biliktiligin arttyrý úshin kadrlar rotatsııasyn jasaýǵa bolady. Máselen, oblystyq jáne aýdandyq aýrýhanalar bir-eki aıǵa maman almastyryp, ózara tájirıbe almasa alady. Áıtpese, búginde keıbir aýdandyq aýrýhanalarda anestezıolog múldem joq. Bar bolsa da, oblys ortalyǵyna, Astana nemese Almatyǵa aýysyp ketýge tyrysady. Rotatsııa jasasa, ol maman oblys ortalyǵyna baryp, kóp nársege úırene alady. Sosyn aýdanǵa kelip, sonyń bárin is júzinde engize alady», - deıdi A.Jumadilov.
Uıym basshysynyńmálimetine sáıkes, kórshi Reseı Federatsııasynda 10 myń adamǵa keletin anestezıologtar men reanımatologtar koeffıtsenti 2,2 adamdy qurap otyr. AQSh-ta - 3,1 bolsa, Eýropada - 3,2. Al Qazaqstanda 10 myń adamǵa tek 1,4 anestezıolog men reanımatolog qana qyzmet kórsetedi.
Aıta keteıik, Astanada anestezıologtar men reanımatologtardyń II kongresi bastaldy. Plenarlyq májilisti ashqan QR Densaýlyq saqtaý vıtse-mınıstri Lıazzat Aqtaeva osy saladaǵy negizgi máselelerdi belgilep berdi. Aldaǵy ýaqytta barlyq qoǵamdyq oryndarda defıbrıllıatorlar ornatylýy múmkin.