Qazaqstanda anestezıologtar, laboranttar men gınekologtar tapshy
ASTANA. QazAqparat - Densaýlyq saqtaýdy damytý respýblıkalyq ortalyǵy densaýlyq saqtaý júıesiniń mamandarǵa degen qajettilikterine taldaý jasap kórdi, dep habarlaıdy QazAqparat.
Onyń nátıjesi kórsetip otyrǵanyndaı, salada birqatar dárigerler men medbıkeler tapshylyǵy bar.
«Mamandyqtar boıynsha bóletin bolsaq, anestezıolog-reanımatologtar, laboranttar, sáýleli dıagnostıka dárigerleri, akýsher-gınekologtar, psıhıatrııalyq baǵyttaǵy mamandar jetispeıdi. Orta býyndy qyzmetkerler arasynan medbıkeler, emhanalyq laboranttar az», - delingen ortalyqtyń baspasóz habarlamasynda.
«Densaýlyq» memlekettik baǵdarlamasy aıasynda kadrlyq máselelerdi sheshý úshin Densaýlyq saqtaýdy damytý respýblıkalyq ortalyǵy janynan densaýlyq saqtaý salasynyń kadrlyq qor observatorııasy quryldy.
Qazirgi ýaqytta medıtsınalyq qyzmetkerlerdiń sany 244 myń adamdy quraıdy, olardyń 74 myńnan astamy - dárigerler, 170 myńy - orta býyndy medıtsına qyzmetkerleri. Ótken jylmen salystyrǵanda, dárigerlermen qamtý deńgeıi 10 myń adamǵa shaqqanda 6,6 protsentke artty jáne 42,2-ni qurap otyr.
Aıta keteıik, bunyń aldynda habarlanǵanyndaı, QR Premer-Mınıstrdiń tapsyrmasymen bıyl qyrkúıekten bastap, medıtsınalyq joǵary oqý oryndarynda pedıatrııa fakýltetteri ashylady.
