Qazaqstanda analar ólimi kóbinese neden bolady - mınıstrdiń jaýaby
"Ókinishke qaraı, búginde respýblıka boıynsha analar ólimi kóbeıip otyr. Endi atalǵan kórsetkish birde joǵary, birde tómen bolyp jatady. Analar ólimine sebep bolatyn jaǵdaılar kóp. Bunyń barlyǵy jan-jaqty zertteledi. Degenmen, buǵan deıingi jaǵdaılardy alatyn bolsaq, taldaýdyń nátıjeleri aýyr patologııanyń bolǵanyn kórsetip otyr. Al ondaı patologııalar bolǵanda bala kóterýge bolmaıdy. Degenmen, áıelder oǵan qaramaıdy. Sosyn júkti bolǵannan keıin aýrýxanaǵa durys qaralmaıdy", - dedi E.Birtanov Astanada ótken baspasóz máslıxatynda.
Mınıstr Astanadaǵy perınataldyq ortalyqta bolǵan jaǵdaıdy da eske aldy. Ol kezde úsh birdeı bosanǵan ana qaıtys bolǵan edi.
"Endi, ondaı kezde saraptama jasalady. Oǵan biraz ýaqyt ketedi. Sebebi patologoanatomdyq jáne morfologııalyq zertteý júrgiziledi. Qazirgi kezde dál osy saraptamalar áli de jasalyp jatyr. Bizde qoǵamdyq densaýlyq saqtaý komıteti bar. Aldaǵy ýaqytta komıtet tóraǵasy Jandarbek Muxtaruly saraptamanyń qorytyndysyn jarııalap, úsh ananyń ólimine sebep bolǵan máselelerdi mindetti túrde aıtyp beredi. Bul qupııa aqparat emes", - dep atap kórsetti E.Birtanov.