Qazaqstanda ana ólimin azaıtýǵa baǵyttalǵan keshendi sharalar qolǵa alynady
ASTANA.KAZINFORM — Búgin vedomstvo alqasynyń otyrysynda Densaýlyq saqtaý mınıstri Aqmaral Álnazarova ana ólimin azaıtýdy densaýlyq saqtaýdy damytýdyń absolıýtti basymdyǵy dep belgiledi. Bul týraly Densaýlyq saqtaý mınıstrligi málim etti.
Qazaqstanda ana ólimi tarıhı tómen deńgeıde qalyp otyr. Aǵymdaǵy jyldyń 10 aıynyń qorytyndysy boıynsha kórsetkish 10,3% ekeni ańǵarylǵan, ıakı byltyrǵy jylmen salystyrǵanda aıtarlyqtaı ózgeris joq, tómen deńgeıde saqtalyp otyr.
Perzenthanalarda medıtsınalyq kómekti jaqsartý boıynsha josparly jumys júrgizilip jatyr sondaı-aq júkti áıelderdi baqylaýdy kúsheıtý úshin áıelderge konsýltatsııalyq qyzmet kórsetý qaıta jandandy. Áıelderdi pregravıdalyq daıarlyqpen qamtý jospardan asyp, respýblıka boıynsha 46,1%-dy qurady.
Densaýlyq saqtaý mınıstri kómek sapasyn odan ári arttyrý úshin kelesi tapsyrmalardy berdi:
óńirlik basqarmalar — júkti áıelderdi baǵdarlaý jáne emdeýge jatqyzý boıynsha NQA-ny ózektendirsin, sondaı-aq bosandyrý jáne balalar boıynsha jaýapty orynbasarlar laýazymdaryn tolyq jınaqtasyn;
2026 jylǵy 1 aqpanǵa deıin júkti áıelderge medıtsınalyq kómekti jetildirý jónindegi sharalar keshenin usynsyn jáne respýblıkalyq ortalyqtardyń jumysyn baǵalaýdy júrgizsin;
ǵylymı ortalyqtar men medıtsınalyq joǵary oqý oryndarynyń basshylaryna óńirlerdiń densaýlyq saqtaý basqarmalarymen birlesip, ásirese aýyldyq jerlerde bosandyrý qyzmeti mamandarynyń praktıkalyq daǵdylaryn arttyrý boıynsha keshendi sharalar ázirleý tapsyryldy.
Densaýlyq saqtaý mınıstrligi Qazaqstandaǵy árbir bolashaq ana memlekettiń senimdi qorǵaýynda bolýy úshin medıtsınalyq kómektiń sapasy men qoljetimdiligin qamtamasyz etý jónindegi júıeli jumysty jalǵastyrmaq.
Eske sala keteıik, jyl basynan beri elimizde ana óliminiń kórsetkishi 10%-ǵa, náreste ólimi kórsetkishi 26%-ǵa tómendegenin jazǵan edik.
Onda elimizde 2030 jylǵa deıin ana men bala densaýlyǵyn saqtaý qyzmetin damytý jospary bekitilgeni aıtylǵan. Sondaı-aq elimizde ana men bala densaýlyǵy boıynsha Ornyqty damý maqsattarynyń ındıkatorlaryna qol jetkizilgen.