Qazaqstanda ana ólim-jitimi azaıdy
ASTANA. KAZINFORM — Sońǵy 30 jylda Qazaqstanda ana ólimi kórsetkishi eń tómen deńgeıge jetti. Bul týraly QR DSM Ana men bala densaýlyǵyn qorǵaý departamentiniń dırektory Maǵrıpa Embergenova aıtyp berdi.
Onyń aıtýynsha, álemde ana men bala óliminiń deńgeıi analar men balalarǵa medıtsınalyq kómekti baǵalaýdyń negizgi kórsetkishi bolyp sanalady. 1990-2015 jyldary Qazaqstan myńjyldyqtyń damý maqsattaryna qol jetkizdi.
Al 2015-2024 jyldary — BUU Qazaqstannyń ana, bala, neonataldyq ólim-jitimdi tómendetý jónindegi ornyqty damý maqsattaryna merziminen buryn qol jetkizdi dep tanyǵan.
— Qazaqstanda sońǵy úsh jylda halyq sany 3,1 mln adamǵa ósken. Búginde bizde 20 mıllıonnan astam adam bar, onyń ishinde 4,8 mln-y — bala týatyn jastaǵy áıelder. 10 jyl ishinde balalar sany 5 mln-nan 6,8 mln-ǵa deıin 34%-ǵa ósti. Shamamen elimizdiń árbir úshinshi azamaty — bala. Jyl saıyn 360 myńǵa jýyq júkti áıel tirkeledi, 370 myńǵa jýyq náreste dúnıege keledi, — dedi spıker.
Spıker júkti áıelderdiń 99%-y bosanýǵa deıingi baqylaýmen jáne konsýltatsııalarmen qamtylǵan. Prenataldy skrınıng 90% júrgiziledi jáne sońǵy jyldary 8%-ǵa ósken.
Ótken jyly elimizde alǵash ret uryq medıtsınasy jobasy iske qosyldy: 55 uryqqa jatyrishilik operatsııa jasaldy, 86 bolashaq náresteniń ómiri saqtaldy. Sondaı-aq, bıyl oqýyn aıaqtaǵan ıntern-balalar dárigerleri úsh esege artty.
— Jańadan ashylǵan 14 balalar baǵyty boıynsha rezıdent-dárigerlerdi daıarlaý josparlanǵan, olardyń ishinde balalar kardıologııasy, allergologııa, ımmýnologııa, nevrologııa jáne basqa baǵyttar bar. Mınıstrlik pedıatrııalyq bólimshelerdi uıymdastyrý arqyly medıtsınalyq-sanıtarııalyq alǵashqy kómek deńgeıindegi balalarǵa barlyq medıtsınalyq qyzmetterdi kórsetýdi biriktirý týraly sheshim qabyldady, — dedi Maǵrıpa Embergenova.
Aıta keteıik, Qazaqstanda el halqynyń densaýlyq jaǵdaıy týraly statıstıkalyq jınaq jaryq kóredi.