Qazaqstanda ana ólimi 9 paıyzǵa tómendedi - Eljan Birtanov
«Sońǵy 3 jylda elimizde negizgi medıtsınalyq-demografııalyq kórsetkishterdi jaqsartýdyń oń dınamıkasy baıqalady. Kútiletin ómir súrý uzaqtyǵy 0,85 jasqa ulǵaıdy, jalpy ólim 3 paıyzdan asa, ana ólimi 9 paıyzǵa tómendedi. Náreste ólimi 6,5 paıyzǵa azaıdy. Týberkýlezden bolatyn ólim 29 paıyzǵa tómendedi», - dedi mınıstr.
Onyń atap ótýinshe, elimizde halyqtyń densaýlyǵyn nyǵaıtý maqsatynda ulttyq skrınıngtik baǵdarlama júrgizilip jatyr. Ol eresek turǵyndar men balalardy jedel zertteýdiń 7 túrin qamtıdy. Bıyl 7 mıllıonnan astam adamdy qamtıtyn 12 mıllıonnan astam tekserý júrgizildi. 304 myńǵa jýyq aýrý anyqtalyp, shamamen 260 myń adam esepke alyndy.
«Elbasynyń tapsyrmasyna sáıkes qoǵamdyq densaýlyqty basqarý boıynsha sharalar jospary qabyldanyp, mektep oqýshylarynyń densaýlyǵyn qorǵaý jónindegi jańa standarttar engizildi. Tolyqtaı alǵanda, 12 mıllıonnan astam adam salaýatty ómir saltyn qalyptastyrý sharalaryna tartyldy. Vaktsınatsııa halyqtyń densaýlyǵyn nyǵaıtýdaǵy mańyzdy sharalardyń biri sanalady. Elimizde vaktsınatsııa alýǵa tıisti halyqtyń 97 paıyzyna ekpe júrgizildi. Bul Dúnıejúzilik densaýlyq saqtaý uıymynyń usynysyna saı keledi», - dedi Eljan Birtanov.