Qazaqstanda ana men bala saýlyǵyn qoldaýdyń jańa tetikteri engizildi
ASTANA. KAZINFORM — 2025 jyly Qazaqstan ana densaýlyǵyn saqtaý júıesin kúsheıtip, áıelderge arnalǵan profılaktıkalyq jáne mamandandyrylǵan qyzmetterdiń qoljetimdiligin keńeıtti, dep habarlaıdy DSM baspasóz qyzmeti.
«Analar saýlyǵy» baǵdarlamasy júktilik bastalǵanǵa deıin áıelderdi zerttep-qaraýǵa jáne saýyqtyrýǵa qoljetimdilikti jaqsartty. Zertteýdiń barlyǵy 12 túri bar. Pregravıdaldyq daıarlyqpen qamtý 23%-ǵa ósip, 46,1%-dy qurady. Erte merzimde esepke turǵan áıelderdiń sany 10%-ǵa ósti.
«Salaýatty Ana» baǵdarlamasy shalǵaı jáne jetýi qıyn aýyldarda turatyn, bosanýy qıyn bolýy múmkin júkti áıelderdi aldyn ala emdeý úshin arnaıy pansıonattarǵa ornalastyrýdy kózdeıdi. Qazir 15 oblysta pansıonattar ashyldy, onda 3 myń júkti áıel kómek aldy.
«Ańsaǵan sábı» ekstrakorporaldyq uryqtandyrý baǵdarlamasy eń suranysqa ıe jobalardyń biri bolyp qala beredi. Jyl saıyn EKU-ǵa 7 myń kvota bólinedi. Tórt jyldyń ishinde 30 myńnan astam áıel emsharadan ótti, kópten kútken 10 myńnan astam bala dúnıege keldi.
— Joǵary tehnologııalyq kómektiń qoljetimdiligin arttyrý maqsatynda 22 oblystyq perınataldyq ortalyqta júkti áıelderdi mamandandyrylǵan zerttep-qaraý men emdeýge jedel jiberý múmkindigimen uryqty qorǵaý ortalyqtary quryldy, — delingen habarlamada.
Budan buryn júktilikti josparlap júrgen áıelder 12 túrli tekserýden tegin óte alatynyn jazǵanbyz.