Qazaqstanda ana men bala densaýlyǵyn qoldaý kúsheıtiledi
ASTANA. KAZINFORM — Qazaqstan Respýblıkasynyń Premer-mınıstri Oljas Bektenov Birikken Ulttar Uıymy Bas hatshysynyń orynbasary, BUU-nyń Halyqtyń qonystanýy salasyndaǵy qorynyń (ıÝNFPA) atqarýshy dırektory Dıene Keıtamen kezdesý ótkizdi. Bul týraly Úkimettiń baspasóz qyzmeti habarlady.
Onda densaýlyq saqtaý salasyndaǵy ózara is-qımyl, ana men balany qorǵaý, reprodýktıvti densaýlyq, áıelder men jastardy qoldaý máseleleri talqylandy.
— Qazaqstan prezıdenti Qasym-Jomart Toqaev BUU-men jan-jaqty yntymaqtastyqqa erekshe mán beredi. QR Úkimeti ulttyq basymdyqtarymyzǵa sáıkes BUU-nyń Halyqtyń qonystanýy salasyndaǵy qorymen áriptestikti odan ári keńeıtýge daıyn. ıÝNFPA-nyń Astanadaǵy eldik keńsesiniń jumysy Qazaqstanda júzege asyrylyp jatqan aýqymdy áleýmettik-ekonomıkalyq reformalardy úılesimdi túrde tolyqtyrady. Birlesken kúsh-jigermen biz neǵurlym ádiletti jáne ınklıýzıvti qoǵam quramyz, — dep atap ótti Oljas Bektenov.
Birikken Ulttar Uıymy Bas hatshysynyń orynbasary, ıÝNFPA-nyń atqarýshy dırektory óz kezeginde Memleket basshysynyń atyna sálemin jetkizip, Qazaqstannyń áleýmettik saladaǵy jetistikterin joǵary baǵalady. Qordyń strategııalyq bastamalarǵa saraptamalyq qoldaýdy jalǵastyrýǵa daıyn ekendigi atap ótildi.
— BUU beıbitshilik, qaýipsizdik jáne ornyqty damý sekildi úsh basty maqsat negizinde qurylǵan. Qazaqstannyń saıasaty osy qaǵıdattarǵa tolyq sáıkes keledi. Ana óliminiń tómendeýi elde áıelder men halyqtyń densaýlyǵyna qanshalyqty úlken kóńil bólinetinin kórsetedi, al jastarǵa, bilim berý men densaýlyq saqtaý salalarynda kórsetilip otyrǵan qamqorlyq joǵary baǵaǵa laıyq.
Biz ıÝNFPA-da Qazaqstanmen tyǵyz yntymaqtastyqty jalǵastyrýǵa nıettimiz. Men Qazaqstannyń jańa Konstıtýtsııasyna erekshe toqtalǵym keledi, onyń ózeginde adam quqyqtary men tańdaý erkindigi jatyr — dál osy qaǵıdat búgingi jahandyq ózgerister dáýirinde asa mańyzdy. Qazaqstan ornyqty jáne adam ıgiligine baǵyttalǵan damýdyń qalaı júzege asýy kerek ekenin júıeli túrde kórsetip keledi, — dep atap ótti Dıene Keıta.
Sonymen qatar ıÝNFPA ókilderi Qazaqstannyń densaýlyq saqtaý júıesindegi tehnologııalyq jabdyqtalý deńgeıiniń joǵary ekenin jáne jasandy ıntellekt sheshimderiniń engizilip jatqanyn atap ótti. Astana qalasyndaǵy qalalyq aýrýhanaǵa barǵan kezde Dıene Keıta medıtsınalyq mekemeniń zamanaýı jabdyqtalýyna nazar aýdaryp, onyń álemniń jetekshi klınıkalary deńgeıine sáıkes keletinin aıtty.
QR Densaýlyq saqtaý mınıstrliginiń málimetinshe, sońǵy 5 jylda ana óliminiń kórsetkishi 35%-ǵa, náreste óliminiń kórsetkishi 25%-ǵa tómendegen. Elimizde bolashaq analardyń densaýlyǵyn nyǵaıtýǵa baǵyttalǵan «Analar saýlyǵy» keshendi baǵdarlamasy júzege asyrylyp jatyr. Óńirlerde 90 Jastar densaýlyq ortalyǵy jumys isteıdi.
Aıta ketelik Oljas Bektenov Bern odaǵynyń otyrysyna qatysýshylardy Qazaqstanda strategııalyq halyqaralyq ınvestıtsııalyq jobalardy júzege asyrýǵa shaqyrǵan edi.
