Qazaqstanda ana qursaǵyndaǵy uryqqa operatsııa júrgizile bastady
ASTANA. KAZINFORM - Fetaldyq (qursaqishilik) operatsııalar perınataldyq nátıjelerdi jaqsartýǵa jáne balalardaǵy múgedektikti azaıtýǵa múmkindik beredi, dep habarlaıdy QR Densaýlyq saqtaý mınıstrligi.
Mınıstrliktiń baspasóz qyzmeti taratqan aqparatqa qaraǵanda, qazaqstandyq dárigerler alǵash ret uryqtyń patologııasy men damý aqaýlaryn túzetý arqyly uryqqa operatsııa jasaı bastady.
Uryqqa operatsııalar bolashaq balanyń densaýlyǵy men ómirin jaqsartatyn jaǵdaılarda jasalady.
Qazaqstan úshin fetaldyq hırýrgııa - medıtsınanyń jańa baǵyty. Jobany QR Densaýlyq saqtaý mınıstrligi AYALA qaıyrymdylyq qorynyń qoldaýymen iske asyrýda.
Medıtsına qyzmetkeri kúni qarsańynda Almaty qalasyndaǵy Perınatologııa jáne balalar kardıohırýrgııasy ortalyǵynda Qazaqstan men Reseıdiń jetekshi mamandarynyń qatysýymen Qazaqstandaǵy alǵashqy qursaqishilik patologııany túzetý boıynsha praktıkalyq master-klass ótti.
«Densaýlyq saqtaý mınıstrligi týǵannan bastap balalardyń múgedektigin tómendetý jónindegi basymdyqty mindet dep sanaıdy. Dúnıejúzindegi fetaldyq hırýrgııa bul úshin eń mańyzdy quraldardyń biri bolyp sanalady. Biz 30 jyldyń ishinde fetaldyq operatsııalar praktıkasynda jınaqtalǵan álemdik tájirıbeni taldadyq. Bul bilimniń barlyǵy Qazaqstanda alǵash ret ázirlengen fetaldyq hırýrgııa baǵdarlamasynyń negizin qalady»,- dep atap ótti QR Densaýlyq saqtaý mınıstri Aqmaral Álnazarova.
Qazaqstanda fetaldyq hırýrgııany iske qosýǵa daıyndyqty Densaýlyq saqtaý mınıstrligi eki jyl boıy júrgizdi. Perınatologııa jáne balalar kardıohırýrgııasy ortalyǵy (Almaty) jáne UMC (Astana) dárigerleriniń brıgadalary Qazaqstanda jáne shetelde teorııalyq jáne praktıkalyq daıarlyqtan ótti.
«Qazaqstanda týǵannan bastap balalardyń múgedektigin tómendetý jónindegi mindet – AYALA qory úshin basty mindet. Biz Densaýlyq saqtaý mınıstrligine elimizde fetaldy hırýrgııasyn bastaýǵa jáne qalyptastyrýǵa kómektesýge qýanyshtymyz. Biz Perınatologııa jáne balalar hırýrgııasy ortalyǵyndaǵy fetaldyq hırýrgııa bólimshesin 29,3 mıllıon teńgeden astam somaǵa arnaıy medıtsınalyq quraldarmen – lazermen jáne fetoskoptarmen jabdyqtadyq», - dep atap ótti AYALA qaıyrymdylyq qorynyń prezıdenti Aıdana Súleımenova.
Fetaldyq medıtsına (uryq hırýrgııasy) – bul ananyń qursaǵyndaǵy uryq patsıent bolyp tabylatyn joǵary mamandandyrylǵan medıtsına salasy. Uryq hırýrgııasy az ınvazıvti em-sharalar arqyly uryqtyń erte patologııalyq jaǵdaılaryn túzetýge jáne emdeýge múmkindik beretin ınnovatsııalyq tehnologııalarǵa negizdelgen.
«Biz jyl saıyn qursaqishilik aqaýlardy túzetý boıynsha 150-ge jýyq operatsııa jasaýdy josparlap otyrmyz. Fetaldyq hırýrgııa jobasy bizdiń ortalyqty damytýdyń jáne elimizdiń analary men balalaryna medıtsınalyq kómektiń sapasyn jaqsartýdyń jańa kezeńi bolady», - dep atap ótti Almaty qalasy Perınatologııa jáne balalar kardıohırýrgııasy ortalyǵynyń dırektory Gúlnar Nurlanova.
Qazirgi ýaqytta az ınvazıvti endoskopııalyq (fetoskopııalyq) operatsııalar ashyq hırýrgııany almastyrýda, óıtkeni olar ana men uryqtyń organızmi úshin qaýipsiz bolyp tabylady. Álemniń kóptegen elderinde jyl saıyn qursaqishilik túzetýge jatatyn uryq aýrýlarynyń spektri keńeıip keledi, jańa tehnologııalar ázirlenýde jáne jetildirilýde, týa bitken júrek aqaýlary, dıafragma jaryqtary jáne ONJ úshin qursaqishilik aralasýlar belsendi engizilýde jáne búgingi kúni olar úlken jetistikterge jetti.
