Qazaqstanda An-28 ushaǵynyń jeteýi ǵana qaldy
ASTANA. QazAqparat - QR IDM Azamattyq avıatsııa komıteti tóraǵasy orynbasarynyń mindetin atqarýshy Toty Ámirova Qazaqstanda An-28 ushaǵynyń jeteýi ǵana qalǵanyn málim etti, dep habarlaıdy «QazAqparat» HAA tilshisi.
«Olardyń úsheýi jaramdylyq merzimdi ótip ketkeni úshin qazirgi tańda ushpaıdy. Bireýi jumys istemese, taǵy biri áýe apatynyń saldarynan qatardan shyǵyp qaldy. An-28 ushaǵynyń ekeýi ǵana qalǵandyqtan, olardy azamattyq avıatsııa komıteti tekseretin bolady. Budan keıin ınjenerler ol áýe kemeleri qoldanylatyny nemese qoldanylmaıtyny týraly sheshim shyǵarady», - deıdi Toty Ámirova jeńil avıatsııadaǵy áýe apattaryna qatysty ótkizilgen baspasóz máslıhatynda.
Sonymen qatar, baspasóz máslıhatynda QR Investıtsııalar jáne damý vıtse-mınıstri Roman Sklıar 3 qazan kúni Almaty-Shymkent baǵytynda shyǵyp, qulaǵan An-28 sanavıatsııa ushaǵynyń apatyna qatysty pikirin bildirdi.
«Qazirgi tańda tergeý amaldarynyń nátıjesin kútken abzal. Soǵan baılanysty sheshim qabyldanatyn bolady. Álbette, ol da múmkin (aldaǵy ýaqytta ushýyna tyıym salý týraly - avt.) Bizge jýyq arada atalǵan ushaqtardy óndiretin zaýyttan ókilder keledi. Olarmen qajetti keńes jumystary júrgiziledi», - deıdi vıtse-mınıstr.
Eske sala ketsek, QR Investıtsııalar jáne damý vıtse-mınıstri Roman Sklıar jyl basynan beri jeńil avıatsııa boıynsha 5 áýe apaty tirkelip, onyń saldarynan 11 adam qaza tapqanyn habarlaǵan bolatyn. Atap aıtqanda, 3 qazan kúni Almatydan Shymkentke ushqan An-28 sanavıatsııa ushaǵy áýe apatyna ushyrap, 5 adam qaza tapqan bolatyn. 10 tamyz kúni Almaty oblysynda Tecnam 2002 oqý-jattyǵý ushaǵy qulap, 2 adam kóz jumǵan. Osyǵan uqsas jaǵdaıda 25 shildede ushqysh jazym bolǵan. Al budan bir aı buryn ıAk-12 ushaǵy apatqa ushyrap, 2 adam mert bolǵan edi.
