Qazaqstanda Amýr jolbarystaryn ósirý: Et satyp alýǵa shyǵyn shyqpaıdy
ASTANA. QazAqparat - Birneshe jyldan keıin Іle-Balqash rezervatyna jiberilgeli otyrǵan jolbarystyń azyǵy úshin et satyp alýǵa bıýdjetten eshqandaı shyǵyn shyqpaıdy. Qazaqstan dalasynda jolbarystardy ósirý boıynsha «QazAqparat» HAA-nyń resmı saýal hatyna jaýap bergen QR AShM Orman sharýashylyǵy jáne janýarlar dúnıesi komıtetinen osyndaı jaýap keldi, dep habarlaıdy «QazAqparat» HAA tilshisi.
Eske sala ketsek, ótken aıdyń basynda Parlament Májilisiniń depýtattary Іle-Balqash rezervatynda Amýr jolbarystaryn ósirýge baılanysty óz alańdaýshylyqtaryn bildirgen bolatyn. Naqtyraq aıtqanda, májilismender «Kúnine 5-6 keli et jeıtin jolbarysty asyraý bizge tıimdi me?» degen másele kótergen edi.
«BAQ arqyly 200 Amýr jolbarysyn Іle-Balqashqa jiberiledi degen aqparatty oqyp jatyrmyz. Oǵan biz qanshalyqty muqtajbyz? Qanshalyqty bul halqymyzǵa nemese tabıǵatymyzǵa kerek? Ol jiberetin aımaqta turyp jatqan halyq bar. Ol eldiń sharýashylyǵy da joq emes. Álbette, jolbarystyń jiberilýi týrızmdi damytýǵa serpin beretin shyǵar, degenmen jolbarysty asyraýǵa ketetin qarajat az emes dep oılaımyn. Reseıdegi bir málimetke qarasaq, bir kirpini asyraýǵa 83 teńge ketedi eken. Esektiń kúndik kútim baǵasy 85 teńge. Jolbarystyń kúndelikti jeıtin 5-6 keli etin bizdiń otbasylar bir aıda jeı me, jemeı me? Jolbarys ósirý bizge qanshalyqty qajet?», - degen edi májilismen Erjan Qudaıbergen.
«2017 jyldyń 8 qyrkúıeginde Qazaqstan Respýblıkasynda jolbarysty qaıta jersindirý baǵdarlamasyn júzege asyrý boıynsha QR Aýyl sharýashylyǵy mınıstrligi men Dúnıejúzilik jabaıy tabıǵat qory (WWF) arasynda yntymaqtastyq týraly memorandýmǵa qol qoıyldy. Jolbarysty qaıta jersindirý boıynsha jumystar keshendi, uzaq merzimdi sıpatqa ıe ekenin atap ótý qajet», - dep habarlaıdy redaktsııanyń resmı saýalyna jaýap bergen vedomstvodan.
Komıtet keltirgen málimetke súıensek, qazirgi ýaqytta jolbarysty qaıta jersindirý boıynsha is-sharalardy iske asyrý maqsatynda Qazaqstan tarapy Reseıdiń Dúnıejúzilik jabaıy tabıǵat qorymen (WWF) birlesip, jolbarystardy qalpyna keltirý baǵdarlamasyn júzege asyrý boıynsha birinshi kezektegi is-sharalardy jasaýda. Naqtyraq aıtqanda, toǵaıly jaıylma ormandardy jáne jabaıy tuıaqty janýarlardyń sanyn qalpyna keltirý, tabıǵatty qorǵaý, jergilikti halyqqa qoldaý kórsetý, aǵartýshylyq qyzmet jáne taǵy basqa is-sharalar kesheni qolǵa alynyp jatyr.
«Jaqyn arada Іle-Balqash óńirine jolbarystardy ákelý jáne jiberý týraly másele is-júzinde qoıylyp otyrǵan joq. Bul oraıda josparda kózdelgen is-sharalardy júzege asyrýǵa baǵyttalǵan qarajatty Reseıdiń Dúnıejúzilik jabaıy tabıǵat qory (WWF) bóledi dep josparlanyp otyr. Іle-Balqash rezervatynyń jalpy aýdany 415,7 myń ga aýmaqty quraıdy. Bul aýmaqta eldimekender joq. Eń birinshi kezekte, jolbarystyń burynǵy mekendeý oryndaryn jáne onyń azyqtaný bazasyn tolyq qalpyna keltirý josparlanǵan. Al bul jumys óte uzaq ýaqytty alady», - delingen jaýap hatta.
Komıtetten sonymen birge, Іle-Balqash rezervatynda jolbarystyń josparlanatyn sany onyń mekendeýi úshin jasalǵan jaǵdaılarǵa tikeleı baılanysty ekenin habarlaıdy. Sondyqtan, bastapqy kezeńderde rezervatqa qansha jolbarystyń jiberiletinin dóp basyp aıtý múmkin emes.
«Jolbarystardyń negizgi qoregi tuıaqty janýarlar bolyp tabylady. Osyǵan baılanysty joǵaryda kórsetilgen josparda jabaıy tuıaqty janýarlardyń sanyn qalpyna keltirý boıynsha birqatar is-sharalar qarastyrylǵan. Bul et ónimderin satyp alýǵa shyǵyn jumsalmaıtynyn bildiredi», - delingen QR AShM Orman sharýashylyǵy jáne janýarlar dúnıesi komıtetiniń jaýap hatynda.
