Qazaqstanda ammıak pen karbamıd óndiretin zaýyt qurylysy bastalady
ASTANA. KAZINFORM — Qazaqstanda Investıtsııalar týraly jasalǵan kelisim sheńberinde ammıak pen karbamıd óndiretin zaýyt qurylysy bastalady. Premer-mınıstr Oljas Bektenov tıisti qaýlyǵa qol qoıdy.
Bıylǵy 4 naýryzda ESTA Construction kompanııasynyń basshylyǵymen kezdesý barysynda Premer-mınıstr jaýapty mınıstrlikterge eki apta ishinde tyńaıtqyshtar shyǵaratyn zaýyt salý úshin Investıtsııalar týraly kelisimge qol qoıýǵa daıyndaýdy tapsyrdy.
Jobany QazaqGaz jáne ESTA birlesken kásiporny — «Qazesta Fertilizers LTD» kompanııasy bazasynda iske asyrý josparlanýda. Zaýyttyń orny retinde Mańǵystaý oblysy tańdaldy, bul ónimderdi Kaspıı teńizi arqyly eksporttaýǵa ońtaıly jaǵdaılardy qamtamasyz etedi. Esta Construction álemdegi eń úzdik 100 qurylys kompanııasynyń qataryna kiredi.
Jobanyń quny: $1,35 mlrd. Qurylysty úsh jarym jylda aıaqtaý josparlanyp otyr. Іske asyrý kezeńinde 3 myńǵa deıin adam tartylyp, qurylys aıaqtalǵannan keıin 400 turaqty jumys orny ashylady.
Zaýyttyń óndiristik qýaty jylyna 700 myń tonnaǵa deıin karbamıdti jáne 42 myń tonna ammıakty quraıdy.
Joba gaz hımııasy salasyn damytýǵa, sondaı-aq ımportty almastyrýǵa jáne qosylǵan quny joǵary ónimderdi daıyndaýǵa baǵyttalǵan.
Qazirgi ýaqytta Qazaqstanda tyńaıtqyshtardyń úsh túrin óndirý jolǵa qoıylǵan: ammıak selıtrasy, ammofos jáne ammonıı sýlfaty. 3,2 mln tonna ǵylymı qajettilik kezinde otandyq qýattar suranystyń jartysyna jýyǵyn ǵana qamtamasyz etedi. Karbamıd óndirisin qurý jónindegi jobany iske asyrý ımportqa táýeldilikti azaıtýǵa jáne elimizdiń azyq-túlik qaýipsizdigin nyǵaıtýǵa múmkindik beredi. Sondaı-aq aýyl sharýashylyǵynyń damýyna oń áser etedi.
Aıta keteıik, Aqtaýda Kaspıı sý tuşytý zaýytynyń qýaty 2 ese artty.