Qazaqstanda Ámirlikter kapıtalynyń qatysýymen 276 birlesken kásiporyn jumys isteıdi
«Búgin Memleket basshysy Qasym-Jomart Toqaev Abý-Dabıge arnaıy ushyp baryp, Birikken Arab Ámirlikteriniń Prezıdenti sheıh Halıfa bın Zaıd Ál Nahaıannyń qaıtys bolýyna baılanysty kóńil aıtty. Bul - Qazaqstannyń shynaıy dosy bolǵan sheıh Halıfaǵa degen Memleket basshysynyń qurmeti. Óıtkeni, ol aımaqtyq jáne halyqaralyq qoǵamdastyqtaǵy elimizdiń bastamalary men iri jobalaryna árdaıym jan-jaqty qoldaý kórsetti.
Máselen, Sheıh Halıfa Zaıd Ál Nahaıan Nur-Sultan qalasyndaǵy mektep qurylysyna 13 mıllıon dollar, Shymkenttegi perınataldi ortalyqqa 25,5 mıllıon dollar, sondaı-aq «Qaraǵandy-Nur-Sultan» avtojolyn qaıta jóndeýge 22 mıllıon dollar grant bóldi.
Koronavırýs pandemııasynyń qıyn-qystaý kezinde Ámirlikter Qazaqstanǵa birinshi bolyp kómek qolyn sozdy. Atap aıtqanda, 100 tonna medıtsınalyq buıym men qorǵanysh zattary, arnaýly kıimder jáne basqa da qural-jabdyqtar jiberdi. Sheıh Halıfanyń qoldaýymen Qazaqstan men Ámirlikter arasynda saýda-ekonomıkalyq yntymaqtastyq qarqyndy damydy», - dep jazdy R. Jeldibaı.
Sonymen qatar ol 2005-2021 jyldar ishinde Ámirlikterden Qazaqstanǵa tartylǵan jalpy tikeleı ınvestıtsııa 2,6 mıllıard dollardy qurady dedi.
«Búginde Qazaqstanda Ámirlikter kapıtalynyń qatysýymen 276 birlesken kásiporyn jumys isteıdi. Sondaı-aq, Elordada quny 1,6 mıllıard dollardy quraıtyn kópfýnktsıonaldy «Abý Dabı Plaza» kesheniniń qurylysy júrip jatyr. Bul – asa iri ekijaqty ınvestıtsııalyq joba.
Qasym-Jomart Kemeluly aıtqandaı, qazaqstandyqtar sheıh Halıfany parasatty basshy, halyqaralyq deńgeıdegi bedeldi saıasatker, kórnekti memleket qaıratkeri, ekijaqty yntymaqtastyqty nyǵaıtýǵa zor eńbek sińirgen tarıhı tulǵa retinde árdaıym esinde saqtaıdy. Sondaı-aq Memleket basshysy «Qasrý-l Mýshrıf» Prezıdent saraıynda jańadan saılanǵan BAÁ Prezıdenti Muhammad ıbn Zaıd Ál Nahaııandy quttyqtap, onyń jumysyna sáttilik, halqyna órkendeý tiledi. Aıta keterlik jaıt, búgin Birikken Arab Ámirlikterine basqa da álem lıderleri kelip kóńil aıtyp jatyr. Máselen, Ulybrıtanııa Premer-mınıstri Borıs Djonson, Frantsııa Prezıdenti Emmanýel Makron, AQSh vıtse-prezıdenti Kamala Harrıs jáne t.b. laýazymdy tulǵalar», - dedi Rýslan Jeldibaı.
Eske salsaq, Memleket basshysy Qasym-Jomart Toqaev BAÁ Prezıdenti sheıh Halıfa ben Zaıd Ál Nahaıannyń qaıtys bolýyna baılanysty osy eldiń jańadan saılanǵan Prezıdenti, Abý Dabıdiń bıleýshisi sheıh Muhammed ben Zaıd Ál Nahaıanǵa jáne bıleýshi áýlettiń músheleri men Ámirlikter halqyna kóńil aıtý úshin Birikken Arab Ámirlikterine keldi.