Qazaqstanda alynatyn munaıdyń balanstyq qory 4 mlrd. 847 mln. tonnany quraıdy - Bozymbaev
«Qazaqstanda 270-ten astam munaı-ken oryndary tirkelgen. Bıylǵy jyldyń basyndaǵy jaǵdaı boıynsha alynatyn munaıdyń balanstyq qorlary 4 mlrd. 847 mln. tonnany quraıdy. Olardyń ishinde 75 paıyzy Qashaǵan, Qarashyǵanaq jáne Teńiz ken oryndarynyń qory. Al, jalpy osy salada jer qoınaýyn paıdalanýǵa arnalǵan 210 kelisimshart jasalǵan. Olardyń ishinen 59 kelisimshart qorlardy baǵalaý kezeńinde, ol balanstyq munaı qorlarynyń 4 paıyzyn quraıdy. Qalǵan ken oryndary 21 paıyzyn alyp otyr,- dedi mınıstr.
Onyń aıtýynsha, ken oryndary keńes zamanynda júrgizilgen barlaý jumystary barysynda tabylǵan. Al 2005-2015 jyldary aralyǵynda 50 munaı ken orny ashyldy. Alynatyn munaıdyń jalpy qory ABS1 sanaty boıynsha 164 mln. tonna jáne S2 sanaty boıynsha 169 mln. tonnany quraıdy.
«Qazir ıgerilip jatqan ken oryndarynyń kóbisi óziniń shynaıy óndirý kezeńine jetti. Olar Ózen, Qalamqas, Jetibaı, Qarajambas, Qumkól jáne taǵy da basqa ken oryndary. Munaı óndirý óndirisiniń ósýin Teńiz, Qarashyǵanaq, Qashaǵan ken oryndaryn ıgerýdi kúsheıtý men geologııalyq barlaý jumystaryn belsendendirý jolymen ǵana jetýge bolady. Osy baǵytta geologııalyq barlaýǵa ınvestıtsııalardy tartýǵa qolaıly jaǵdaı jasaý úshin Energetıka mınıstrligi júıeli jumys júrgizip keledi. Sonymen qosa, zańnamaǵa ózgerister engizý jumystaryn atqaryp otyr», - dedi Bozymbaev.
