Qazaqstanda alty et klasteri qurylyp, astyqty tereń óńdeıtin zaýyttar salynady
ASTANA. KAZINFORM — Qazaqstanda 2027 jyly jylyna 228 myń tonna sút óndirýge qaýqarly taǵy 21 taýarly-sút fermasyn salý josparlanyp otyr. Aýyl sharýashylyǵy mınıstri Aıdarbek Saparovtyń tóraǵalyǵymen ótken keńeste mal sharýashylyǵyn, ónimdi tereń óńdeýdi jáne agrosalany tsıfrlandyrýdy damytý mindetteri talqylandy. Bul týraly AShM málim etti.
Aıdarbek Saparov Memleket basshysy qoıǵan mindetter strategııalyq baǵdarlardy naqty ekonomıkalyq sheshimdermen ushtastyrýdy talap etetinin atap ótti. Agroónerkásiptik keshen úshin bul óndiris kólemin ulǵaıtyp qana qoımaı, salanyń qurylymyn sapaly ózgertý, aýyl sharýashylyǵy ónimderin tereń óńdeýdi damytý, jańa óndiris oryndaryn ashý, eńbek ónimdiligi men salanyń tehnologııalyq jaraqtandyrylý deńgeıin arttyrý degendi bildiredi.
— Joldaý elimizdi odan ári damytýdyń naqty baǵdarlaryn aıqyndaıdy. Bizdiń mindetimiz — qoıylǵan maqsattardy talqylaýmen shektelmeı, olardyń is júzinde oryndalýyn qamtamasyz etý. Árbir tapsyrma naqty jobalarmen, ınvestıtsııalarmen, iske asyrý merzimderimen jáne ólshenetin nátıjelermen qamtamasyz etilýi tıis, — dedi Aıdarbek Saparov.
Aýyl sharýashylyǵy vıtse-mınıstri Azat Sultanov strategııalyq qujatta kózdelgen tapsyrmalardy iske asyrý tetikterine egjeı-tegjeıli toqtaldy.
Agrarlyq sektordyń qoljetimdi qarjylandyrý kózderine qol jetkizýin keńeıtý negizgi basymdyqtardyń biri bolady. Osy maqsatta bıýdjet qarajaty men kommertsııalyq qarjy resýrstaryn ushtastyrý arqyly ınvestıtsııa tartý jumystary jalǵasady. Qarjy mal sharýashylyǵyn damytýǵa, aýyl sharýashylyǵy ónimderin saqtaý jáne óńdeý nysandaryn salýǵa baǵyttalady.
Sonymen qatar salany tehnıkalyq qaıta jaraqtandyrý jumystary jedeldetiledi. «QazAgroQarjy» AQ arqyly traktorlar men kombaındardy jeńildetilgen lızıngke berý jalǵasady. Budan bólek, senim bildirilgen agent arqyly aýyl sharýashylyǵy janýarlaryn satyp alýǵa jeńildetilgen nesıe berý tetigi pysyqtalýda. Bul tetikti Soltústik Qazaqstan oblysynyń tájirıbesin eskere otyryp iske qosý jáne 2027 jyly qosymsha qarjylandyrý qarastyrý josparlanyp otyr.
— Mal sharýashylyǵynda óndiristik qýattardy keńeıtýge basymdyq beriledi. Qazirgi ýaqytta óńirlerde jylyna 462 myń tonna sút óndirýge arnalǵan 71 taýarly-sút fermasynyń qurylysy men iske asyrylýy boıynsha jobalar júzege asyrylýda. Aǵymdaǵy jyldyń sońyna deıin paıdalanýǵa berilgen nysandardy jobalyq qýatynyń 70%-yna jetkizý, al kelesi jyly tolyq qýatynda jumys isteýin qamtamasyz etý josparlanǵan. 2027 jylǵa jylyna 228 myń tonna sút óndirýge arnalǵan taǵy 21 taýarly-sút fermasyn qamtıtyn jobalar pýly qalyptastyryldy, — delingen habarlamada.
Sonymen qatar óndiristiń tolyq tsıkli qamtylǵan alty et klasterin qurý jumystary júrgizilýde. Túrkistan oblysynda alǵashqy iri mamandandyrylǵan mal bırjasyn salý josparlanyp otyr.
Aýyl sharýashylyǵy ónimderin óńdeýdi damytýǵa jáne shıkizat eksportynan qosylǵan quny joǵary daıyn ónim eksporttaýǵa kóshýge erekshe nazar aýdaryldy. Sońǵy úsh jylda aýyl sharýashylyǵy shıkizatynyń negizgi túrlerin óńdeý úlesi artty. 2025 jyly óńdelgen ónim eksporty 35%-ǵa ósip, 3,6 mlrd AQSh dollaryna jetti.
Mınıstrliktiń málimetinshe, astyqty tereń óńdeý salasynda 2029 jylǵa deıin jylyna 5,8 mln tonna shıkizat óńdeýge qaýqarly alty iri ınvestıtsııalyq jobany iske asyrý josparlanǵan. Bul kásiporyndar krahmal, glıýten, bıoetanol, amınqyshqyldary jáne tereń óńdeý nátıjesinde alynatyn basqa da ónimderdi óndirýge baǵyttalady. Túrkistan jáne Jambyl oblystaryndaǵy eki zaýyt paıdalanýǵa berildi.
AÓK-ti tsıfrlyq transformatsııalaý aıasynda 2027 jyldyń sońyna deıin jasandy ıntellekt, dálme-dál eginshilik jáne «aqyldy fermalar» tehnologııalaryn engizý kózdelgen. Al 2028 jyldyń sońyna deıin biryńǵaı salalyq Digital Agro Platform tsıfrlyq platformasy men Smart Data Agro derekter qoryn qurý josparlanyp otyr.
Bul júıeler salanyń aqparattyq júıelerin biriktirýge, taldamalyq derekterge qoljetimdilikti keńeıtýge, aýyl sharýashylyǵy daqyldarynyń ónimdiligin boljaýǵa jáne basqarýshylyq sheshimderdiń sapasyn arttyrýǵa múmkindik beredi.
Memleket basshysynyń tapsyrmalaryn iske asyrý aıasynda qabyldanyp jatqan sharalar men perspektıvaly bastamalar týraly Aqmola jáne Soltústik Qazaqstan oblystary ákimderiniń orynbasarlary baıandady.
Keńes qorytyndysy boıynsha mınıstr oblys ákimdikterine aýyl sharýashylyǵy ónimderin tereń óńdeýdi, mal sharýashylyǵyn, saqtaý ınfraqurylymyn jáne AÓK-ti tsıfrlandyrýdy damytý jónindegi naqty usynystardy qysqa merzimde Aýyl sharýashylyǵy mınıstrligine engizýdi tapsyrdy.
Usynystarda perspektıvaly ınvestıtsııalyq jobalar, áleýetti ınvestorlar, ınvestıtsııa kólemi, qarjylandyrý kózderi, iske asyrý merzimderi jáne kútiletin ekonomıkalyq tıimdilik kórsetilýi tıis.
Aıdarbek Saparov árbir bastama naqty ınvestıtsııalyq usynystarmen jáne ekonomıkalyq esepteýlermen negizdelip, is júzinde nátıje berýi qajettigin atap ótti.
— Formaldy tásilge jol bermeý mańyzdy. Árbir bastamanyń artynda naqty ınvestorlar, ekonomıkalyq esepteýler, aıqyn merzimder men jeke jaýapkershilik turýy kerek. Bizge esep úshin jasalǵan tizimder emes, naqty ekonomıkalyq nátıje beretin jobalar qajet. Mınıstrlik bul jumysty turaqty baqylaýda ustaıdy. Memleket basshysynyń tapsyrmalary sapaly ári belgilengen merzimde oryndalýy tıis, — dep túıindedi mınıstr.
Belgilengen basymdyqtardy iske asyrý agroónerkásiptik keshendi qurylymdyq jańǵyrtýdy jedeldetýge, ınvestıtsııalyq belsendilikti arttyrýǵa, qosylǵan quny joǵary ónim óndirisin ulǵaıtýǵa jáne Qazaqstannyń syrtqy naryqtardaǵy ustanymyn nyǵaıtýǵa múmkindik beredi.
