Qazaqstanda almanyń 70 paıyzy syrttan tasylady
TARAZ. QazAqparat - Jambyl oblysynda «Shaıqoryq baýy» AÓK negizinde ótip jatqan ǵylymı-praktıkalyq semınarda halyqaralyq deńgeıdegi úzdik sarapshylar qarqyndy baǵbanshylyqtaǵy zamanaýı tehnologııalar máselelerin talqylady.
Sharaǵa oblystyq jáne aýdandyq ákimdikterdiń, memlekettik damý ınstıtýttarynyń, bank salasynyń ókilderi, jeke ınvestorlar, aımaqtyq baǵbandar qatysty. Semınardy «FTC Equity» JShS - polshalyq jáne ıtalııalyq seriktesterimen birigip jáne «Aýyl sharýashylyǵyn qarjylaı qoldaý qory» AQ, «Taraz» ÁKK» AQ qoldaýymen uıymdastyrdy.
Bıyl Jambyl oblysynda jylyna 3 myń tonna alma beretin alǵashqy joba - «Shaıqoryq baýy» AÓK iske qarqyndy alma baǵy qosyldy. Bıylǵy maýsym aıynda paıdalanýǵa berilgen jobanyń quny - 709,7 mıllıon teńge. Jalpy aýmaǵy -77 gektar, onyń 50 gektarynda Golden delıshes, Aıdared, Gala tuqymdy alma kóshetteri egildi. Jetkizýshi - Arno Group (Polsha) kompanııasynyń Qazaqstandaǵy ókili - «FTC Equity» JShS boldy.
Qarqyndy baý 3-4 jyldan keıin mol ónim bere alady. Eger dástúrli baý shamamen 5-10 tonna jemis berse, qarqyndy baý - 70 tonnaǵa deıin jemis bere alady.
Búgingi tańda Qazaqstan alys shetelden jylyna 150 myń tonna almany ımporttaıdy. Otandyq óndiris jalpy tutyný kóleminiń 30 % ǵana qamtıdy. Alaıda, ótken jyldardyń tájirıbesi men zamanaýı tehnologııalardy paıdalanyp, Qazaqstannyń baǵbanshylyǵy jańa damý deńgeıine kóterilip, elimizdiń aýylsharýashylyq salasyndaǵy lokomotıvteriniń birine aınalýy múmkindigi bar.
2016-2020 jyldarǵa arnalǵan Jambyl oblysy aýmaǵyndaǵy damý baǵdarlamasy boıynsha qarqyndy baý aýmaǵyn 1600 gektarǵa jetkizip, oblys aýmaǵynyń jemisti tutyný normasynyń 85% qamtý josparlanǵan. 
