Qazaqstanda alma baqtary aýmaǵyn ulǵaıtýǵa ekpin qoıylady
NUR-SULTAN. QazAqparat – Búgin Úkimet otyrysynda QR Aýyl sharýashylyǵy mınıstri Saparhan Omarov alma tapshylyǵyn tolyǵymen jabatyn merzimdi atady, dep habarlaıdy QazAqparat tilshisi.
«Qazirgi ýaqytta respýblıkada jalpy alańy 35,1 myń gektarda jalpy kólemi 216,5 myń tonna alma óndirýmen 34 iri kompanııa, 195 orta, 1370 shaǵyn sharýashylyq jáne jeke qosalqy sharýashylyq aınalysady. Bul rette ónerkásiptik qarqyndy baqtarda almanyń túsimdiligi gektaryna 40-45 tonnany, al usaq jáne jeke qosalqy sharýashylyqtarda gektaryna 7-10 tonnany quraıdy», - dedi mınıstr Úkimet otyrysynda.
Onyń aıtýynsha, alma baqtarynyń aýmaǵyn ulǵaıtý boıynsha basty nazardy iri jáne orta sharýashylyqtarǵa aýdarý kerek, al usaq sharýashylyqtar men jeke qosalqy sharýashylyqtardy kooperatıvterge biriktirý qajet.
«Almaǵa degen qajettilik kólemi 344,3 myń tonnany, ımport 128 myń tonnany quraıdy. Іshki naryqty 6,6 myń gektar jańa qarqyndy baqtar otyrǵyzý esebinen molaıtý boljanyp otyr.
Jańa baqtar otyrǵyzýdy negizgi baq sharýshylyǵymen aınalysatyn Almaty, Jambyl jáne Túrkistan oblystaryna, Shymkent qalasyna shoǵyrlandyrý usynylady. Atalǵan óńirler boıynsha jumys júrgizilip jatqanyn atap ótý qajet. Aldaǵy 3 jylǵa arnalǵan otyrǵyzý alańy 5,5 myń gektar bolatyn joba pýly bar. Josparlanǵan alańdar jobalarmen qamtamasyz etilmegen óńirler boıynsha tıisti jumystar júrgizý qajet. Bul jerde Túrkistan, Almaty jáne Jambyl oblystarynda 5 myń gektar baq otyrǵyzýdy kózdep otyrǵan «Goknýr Gıda» túrik kompanııasymen jobany iske asyrýynyń mańyzdylyǵyna erekshe nazar aýdarǵym keledi», - dedi S. Omarov.
Onyń sózine qaraǵanda, tolyq jemis berýge birtindep shyǵa otyryp, jylyna orta eseppen 2 - 2,2 myń gektar baq otyrǵyzý alma tapshylyǵyn tolyǵymen jabýǵa jáne 2024 jyly tolyq ózin-ózi qamtamasyz etýge múmkindik beredi.
