Qazaqstanda allergologııa dıagnostıkasynyń álemdik ozyq tásili engiziledi - QR bas balalar allergology J.Ispaeva
ALMATY. QazAqparat - Qazaqstan TMD elderiniń ishinde birinshi bolyp Eýropalyq allergologtar men ımmýnologtar qaýymdastyǵyna kirdi. Endigi kezekte Qazaqstanda allergologııa dıagnostıkasynyń álemdik ozyq tásili engiziledi. Bul týraly búgin Almatyda ótken «Demikpe jáne allergııa» konferentsııasy barysynda QR bas balalar allergology Janat Ispaeva málimdedi.
«El medıtsınasy úshin bul jańalyqtyń mańyzy zor. Endigi kezekte Qazaqstan allergııa jáne demikpe dertimen kúrestiń álemdik ozyq tásilderin endiretin bolady. Búgingi bolyp jatqan sezd sonyń alǵashqy qadamy desek artyq emes. Búgingi otyrystyń jańalyǵy tek allergııa dertin emdeý týraly emes, sondaı-aq dertti durys anyqtaý bolyp otyr. Qazirgi kezde álemde allergııa, demikpeni anyqtaýdyń molekýlıarlyq tásili keń qanat jaıýda. Bul noý-haý endi Qazaqstanǵa engiziletin bolady», - dedi ol. Mamannyń aıtýynsha, Qazaqstanda 600-ge tarta allergen bar. Ǵylymnyń alǵa jyljýymen qatar allergenderdiń qatary da jyldan-jylǵa kóbeıip keledi. Qazaqstanda jyl saıyn allergııa, demikpemen aýyratyndardyń sany 10-15 paıyzǵa artýda. Búgingi konferentsııaǵa álemniń 8 elinen - Germanııa, Avstrııa, Grekııa, Ulybrıtanııa, Ózbekstan, Reseı, Ýkraına elderinen jetekshi mamandar qatysýda. Otyrys barysynda qaýipti dertpen tıimdi kúres júrgizý tásilderi, emdeý, dıagnostıka máseleleri talqylanyp jatyr.
