Qazaqstanda allergııasy bar naýqastar kóbeıdi
ASTANA. KAZINFORM – Qazaqstandyqtardyń 40 paıyzy osy dertke shaldyqqan. Jalpy, sońǵy jyldary allergııasy barlar sany álem elderinde kúrt ósken. Bul týraly Astanada ótken «Allergologııa men ımmýnologııadaǵy sala aralyq máseleler» III ǵylymı-praktıkalyq konferentsııasynda aıtyldy.
Jıyn barysynda aq halattylar allergııalyq aýrýlardyń aldyn alýǵa bolatyn jańa tetikterdi talqylady. Konferentsııaǵa Qazaqstannan bólek Ispanııa, Túrkııa, Ýkraına, Germanııa, Úndistan men Reseı Federatsııasynan allergolog-ımmýnolog mamandar jınaldy.
- Eń ózekti másele – osy allergııalyq jáne ımmýndyq sıstemaǵa baılanysty aýrýlardyń jyldan jylǵa kóbeıip kele jatqany. 2000 jyldardyń basynda 5 paıyz bolatyn bolsa, qazir allergııaǵa shaldyqqandar sany 40 paıyzǵa deıin ósti. Biraq ta tirkelmegenderi de bar. Kóp naýqas mamandarǵa, allergolog-ımmýnologterge kele almaı, basqa mamandarda júredi, - deıdi QR Prezıdenti is basqarmasy aýrýhanasynyń bas allergolog-ımmýnologi Ǵalııa Túsipbekova.
Qazaqstanda allergolog maman tapshy. Salada el boıynsha nebári 200-ge jýyq maman qyzmet etip júr. Onyń 60-qa jýyǵy memlekettik emhanalarda jumys isteıdi. Al, bas qalada dáriger sany 25-ke de jetpeıdi. Aıta keteıik, sheteldik mamandar Qazaqstandyq allergologterdiń áleýetin joǵary baǵalaıdy.
- Qazaqstanda bilikti dárigerler sany az bolǵanymen, emdeý sapsy joǵary. Meniń oıymsha, álemniń barlyq elderi allergııamen birkelki kúresedi. Emdeý tásilderi de birdeı. Iá, arasynda dárigerlerdiń jekemenshik josparlary jaǵynan aıyrmashylyq bolýy múmkin. Biraq, osyndaı konferentsııalar arqyly biz pikir almasyp, oı bólisip turamyz. Túrli sheberlik sabaqtaryn ótkizý osy salada eńbek etip júrgenderdiń biliktiligin arttyrýǵa yqpal etedi, - deıdi allergolog-ımmýnolog Darıa Fomına (Reseı).
Aıta keteıik, «Allergologııa men ımmýnologııadaǵy sala aralyq máseleler» III ǵylymı-praktıkalyq konferentsııasy dástúrli túrde jyl saıyn uıymdastyrylyp turady. Bul jolǵy kelesi kezdesý eki kúnge jalǵasady.
Konferentsııada sımpozıýmdar uıymdastyrylyp, sheteldik jáne qazaqstandyq mamandar allergologııa men ımmýnologııadaǵy eń ózekti máseleler boıynsha pikirtalas ótkizdi.
Dárilik allergııany dıagnostıkalaý men emdeýdegi jetistikter, ımmýndyq júıeniń týa bitken aqaýlary taqyrybynda sheberlik sabaqtar uıymdastyryldy.