Qazaqstanda alkogol ónimine aktsızderden túsimder eki esege deıin ulǵaıdy

NUR-SULTAN. QazAqparat - Jyl basynan beri el aýmaǵynda óndiriletin alkogol ónimderine salynatyn aktsızderden túsimder 38,7 mlrd teńgeni qurap, 1,8 esege ósim berdi, dep habarlaıdy QazAqparat.

Memlekettik kirister komıteti ótken jyldyń sáıkes kezeńinde 21,9 mlrd teńge túskenin atap ótti. Vedomstvo salyqtyq tekserýler, quqyq qorǵaý organdarymen birlesken jedel is-sharalar júrgizý arqyly alkogol ónimderiniń zańsyz aınalymyn anyqtaý jáne jolyn kesý boıynsha júıeli negizde jumys júrgizýde.

«Máselen, jyl basynan beri ruqsat qujattary joq 829,2 myń lıtr zańsyz alkogol ónimi jáne esepke alý-baqylaý markalary aınalymnan alyndy. Aktsızdik beketterdi kúndelikti, jedel baqylaý, óndiris jelilerindegi baqylaý-esepke alý aspaptary jáne jazyp berilgen elektrondyq shot-faktýralar arqyly alkogol óniminiń óndirisi men aınalymyn qashyqtyqtan baqylaý basymdyqqa ıe. Aǵymdaǵy jyldyń 1 sáýirinen bastap jumystan tys (túngi) ýaqytta zańsyz aınalym óndirisin boldyrmaý úshin alkogol ónimin óndirý jelilerinde elektr energııasyn esepteýishter ornatyldy.Sonymen qatar, aktsızdiń ósýi alkogol óniminiń óndirisi men ımporty kóleminiń ulǵaıýymen, sondaı-aq syraǵa arnalǵan aktsız mólsherlemesiniń 1 lıtrge 57 teńgeden 79 teńgege deıin jáne tabıǵı emes sharaptarǵa 35 teńgeden 100% spırttiń lıtrine 2 550 teńgege deıin artýymen baılanysty», - dep jazdy komıtetten.

Aǵymdaǵy jyldyń qańtar aıynan bastap «Etıl spırti men alkogol óniminiń óndirilýin jáne aınalymyn memlekettik retteý týraly» Zańmen konıak pen brendıge eń tómengi bólshek saýda baǵalaryn retteý engizilgen, ol 1 lıtrge 2 930 teńgeni quraıdy, tıisinshe «psevdo-konıak» óndirisi azaıdy jáne kúshti lıker-araq ónimderi retinde aktsız tóleý 100% spırt teńge/lıtr 250 teńgeden 2 550 teńgege deıin qurady.