Qazaqstanda alkogol ónimin shyǵarýshylar 2016 jylǵa negizdelgen aktsızdi aǵymdaǵy jylǵy deńgeıde qaldyrýdy surap otyr
ASTANA. QazAqparat - Elimizde alkogol ónimderin shyǵaratyndar Úkimetten 2016 jylǵa arnalǵan aktsız mólsherlemesin aǵymdaǵy jylǵy deńgeıde qaldyrýdy surap otyr. Bul týraly búgin Astanada ótken baspasóz máslıhatynda «QazAlko» qaýymdastyǵynyń prezıdenti Ámirjan Qalıev málim etti.
Onyń sózine qaraǵanda, ótken jyldyń ekinshi jartyjyldyǵynan bastap eldiń ekonomıkasyna syrtqy faktorlardyń keri áserinen alkogol ónimin óndiretinder qıyn jaǵdaıǵa tap boldy. RF-te 2015-2016 jyldarǵa aktsız mólsherlemesi 2014 jyldyń deńgeıinde qalýynan, kórshi eldegi alkogoldik ónimniń baǵasy Qazaqstanǵa qaraǵanda arzandaý boldy. Osy oraıda jeke adamdar RF-ten Qazaqstanǵa atalǵan ónimderdi tasymaldaýdy kúrt arttyrǵan. Alaıda teńgeniń baǵamy erkin aınalymǵa shyqqannan beri bul jaǵdaı turaqtaldy.
Ámirjan Qalıevtiń paıymynsha, otandyq alkogoldik ónimge aktsızderdiń artýy óndiris kóleminiń quldyraýyna, bıýdjetke aktsız alymdaryn tómendetýge jáne birqatar kásiporyndardyń bankrotqa ushyraýyna alyp keledi. Bul turǵyda Qazaqstan naryǵyn kórshiles elderdiń ónimderi basyp alýy yqtımal.
Onyń aıtýynsha, QR Salyq kodeksinde qarastyrylǵandaı aktsız araqqa qazirgi 480 teńge/l ornyna 640 teńge/l -ge kóterilgen jaǵdaıda, ıaǵnı araqtyń qunyndaǵy aktsızdiń úlesi 40-45 paıyzyn alatynyn eskergende Qazaqstanda óndirilgen araqtyń eń tómengi bólshek saýda baǵasy jarty lıtrlik bótelke úshin 800 teńgege deıin ósedi.
Budan bólek Á. Qalıev Qyrǵyzstan jaǵynan arzan alkogoldik ónimniń tasymaly artatynyn alǵa tartýda. Buǵan olardyń aktsızderiniń 2,5 paıyzǵa tómen bolýy sebep bolmaq. Ol osynyń saldarynan kóleńkeli alkogol ónimderi aınalymy ulǵaıatyndyǵyn atap ótti.
