Qazaqstanda alıment boryshkerleriniń bereshegi 18 mlrd teńgege jetken
ASTANA. KAZINFORM — Olarǵa zań aıasynda barlyq májbúrlep oryndatý sharasy qoldanylyp jatyr. Bul jóninde QR Ádilet mınıstrligi Májbúrlep oryndatý komıtetiniń tóraǵasy Maqsat Balabekov Ortalyq kommýnıkatsııalar qyzmetinde ótken brıfıngte málimdedi.
— Áleýmettik mańyzy bar ister sanaty boıynsha, májbúrlep oryndatý isteri erekshe baqylaýda. 2025 jyly májbúrlep oryndatý protsesinde 354 myńnan astam alıment óndirý qujaty boldy. Onyń 60 myńǵa jýyǵy oryndaldy. Nátıjesinde, 2026 jyldyń basynda 295 myń alıment óndirý qujaty qaldy. Problemalyq alıment sany — 12,7 myń, nemese 4%. Olardyń jalpy bereshegi — 18 mıllıard teńge. Kóp jaǵdaıda alıment boryshkerlerdiń jalaqysynan jáne basqa da tabys kózderinen óndiriledi, — dedi ol.
Sondaı-aq M. Balabekov boryshkerlerdiń bereshegin bermeýi sebepterine toqtaldy.
— Aıta ketetin jaıt — qaryzdyń qalyptasýy eki negizgi faktorǵa baılanysty. Birinshisi — resmı jumystyń bolmaýy. Ekinshisi — kiristi qasaqana jasyrý. 2025 jyly boryshkerlerdi jumysqa ornalastyrý maqsatynda ákimdiktermen birlesip, bos jumys oryndarynyń 645 jármeńkesi uıymdastyryldy. Nátıjesinde, 6,5 myńnan astam alıment boıynsha boryshker jumyspen qamtyldy, — dedi ol.
Budan bólek, mamannyń sózinshe, alıment tóleý boıynsha bereshegi bar azamattarǵa zań aıasynda barlyq májbúrlep oryndatý sharasy qoldanylyp jatyr.
— Ótken jyly 4824 boryshker ákimshilik jaýapkershilikke, al 380-i qylmystyq jaýapkershilikke tartyldy. Boryshkerlerdiń jasyryn kiristerin anyqtaý maqsatynda Ádilet mınıstrligi Eńbek jáne halyqty áleýmettik qorǵaý mınıstrligimen jáne Qarjy mınıstrligimen birlesip jumystar atqaryp keledi. Aldaǵy ýaqytta boryshkerler týraly málimetterdi qamtıtyn aqparattyq júıeler biriktiriledi, — dedi M. Balabekov.
Onyń sózinshe, mundaı sharalar boryshkerlerdiń áleýmettik jaǵdaıyn jáne basqa da kiris kózderin odan ári anyqtaýǵa múmkindik beredi.
Aıta keteıik, buǵan deıin Ádilet mınıstrligi májbúrlep oryndatý nátıjelerin jarııalaǵanyn jazǵanbyz.
