Qazaqstanda áli kúnge murajaı jádigerleriniń biryńǵaı qory joq - D. Qonaev murajaı -úıiniń dırektory
ALMATY. 24 mamyr. QazAqparat /Erlik Erjanuly/ - Qazaqstanda murajaı jádigerlerin saqtaýǵa arnalǵan arnaıy zań joq. Bul 17-18 mamyr kúnderi Astanada ótken «Murajaı - tarıh pen búgingi kúnniń fenomeni» dep atalatyn halyqaralyq murajaıtanýshylar forýmynda aıtyldy.
Onda «Murajaı kreatıvti álemde» degen taqyrypta baıandama jasaǵan Almatydaǵy Dinmuhamed Qonaev murajaı-úıiniń dırektory Bolysbek Battalhanov jýrnalıster, murajaı qyzmetkerleri men murajaıtanýshylar arasynda júrgizilgen saýalnama qorytyndysy boıynsha «Eń úzdik murajaı jetekshisi» baıqaýynyń jeńimpazy atanyp, «Samuryq qus» belgisi men arnaıy dıplommen marapattalǵan edi.
«Qazir shet elderde murajaılar ózine kórermendi kóbirek tartý úshin túrli is-sharalardy júzege asyrýda. Bul úrdisten Qazaqstan da tys qalmaýy kerek. Murajaı jádigerleri sóredegi óli zat bolyp qalmaýy tıis. Ol kórermenniń qyzyǵýshylyǵyn syrtqy túri men sıpatymen ǵana emes, materıaldyq jáne rýhanı qundylyǵymen ózine tartýy kerek. Bul úshin ony saqtap, jurtshylyqqa tanystyratyn qor saqtaýshysy men ekskýrsovodtyń murajaıdaǵy mańyzy men rólin kóterý kerek. Ondaǵy eń basty bul mamandar qazir eń tómengi 16-satyǵa shegerilip, olardyń ornyn keńesshi, ǵylymı qyzmetker sııaqty qosalqy qyzmet salalarynyń ókilderi basyp otyr», - deıdi Bolysbek Zamanbekuly. Onyń paıymdaýynsha, halyqtyń murajaıǵa kóp kelýi eń aldymen ondaǵy ekskýrsovodtyń kórsetetin qyzmetine baılanysty. Sondyqtan onda murajaıtanýshylar jumys jasaýy kerek. Arnaıy mamandar bolmaǵan soń ony qazir kóbine tarıhshylar atqarýda. Al onda áńgime ár dáýirdiń túrli jádigerleri jóninde bolý kerek. Oǵan belgili kezeń boıynsha mamandanǵandyqtan kóbine-kóp tarıhshylardyń biliktiligi jete bermeıdi.
«Qazir murajaı jádigerlerin saqtaý týraly arnaıy zań joq. Sondyqtan ár murajaı óz múmkindigine qaraı jádigerdi ózinshe saqtaıdy. Memlekettiń basty qundylyǵynyń biri sanalatyn bul jádigerler búlinip, joǵalyp ketse oǵan eshkim jaýap bermeıdi. Óıtkeni olar nómirlenip, Mádenıet mınıstrliginde tirkelmegen», - deıdi B. Battalhanov. Onyń aıtýynsha, Dinmuhamed Qonaev murajaı-úıiniń 3032 jádigeri Almaty qalasy ákimdigine qarasty bolǵandyqtan Mádenıet basqarmasynda tirkeýli tur. Ol ákimshiliktiń resmı ruqsatynsyz ýaqytsha bolsa da eshqaıda áketilmeıdi jáne eshkimge de berilmeıdi.
