Qazaqstanda áli kúnge deıin birde-bir oqý ornynda rıelterler daıyndalmaıdy - Gúlshara Dúısembaeva

ALMATY. 4 tamyz. QazAqparat /Erlik Erjanuly/ - Qazaqstan rıelterleri qaýymdastyǵy endi qyzmetkerlerdi ǵana emes kompanııalardyń ózderin de sertıfıkattaý máselesimen aınalyspaq.

Bul týraly búgin Almatyda Qazaqstan rıeltorlarynyń birikken qaýymdastyǵy janynan qurylǵan jumys tobynyń alǵashqy májilisinde aıtyldy.

"Qazaqstandaǵy eshbir joǵary jáne arnaýly oqý oryndarynda rıelterler ázirlenbeıdi. Qazaqstan rıelterler qaýymdastyǵynyń rıelterler mektebinde ǵana bastaýysh jáne kásibı bilim jetildirý kýrstary bar. Bul mekteptiń jumys istep jatqanyna 6-7 jyldyń júzi bolyp qaldy. Óz kýrstarymyzdy jasaýǵa amerıkan rıelterler qaýymdastyǵy kómektesti", - deıdi Qazaqstan rıeltorlarynyń birikken qaýymdastyǵynyń vıtse-prezıdenti Gúlshara Dúısembaeva. Onyń aıtýynsha, bastapqy kezde bir aptalyq bolǵan bul kýrstar qazirgi kezde merzimdik, mazmundyq jaǵynan baıytylyp, túri de kóbeıdi. Sondyqtan bastapqy kezde mamandardy oqytý men sertıfıkattaý jaǵyna kóbirek mán berip kelgen qaýymdastyq endi kompanııalardy da sertıfıkattaý máselesin kóterip otyr. Aldaǵy ýaqytta bul máselemen arnaıy qurylǵan komıtet jan-jaqty aınalyspaq. Jalpy qazirgi tańda ózge elderde rıelterler oqý oryndarynda arnaıy daıyndalýda.