Qazaqstanda áli KSRO pasporttarymen júrgender bar – ІІM
Búgingi tańda QR ІІM Kóshi-qon qyzmeti komıteti Adam quqyqtary jáne zańdylyqty saqtaý jónindegi Qazaqstandyq halyqaralyq bıýromen birlesip, jeke basyn kýálandyratyn qujattary joq elimizdiń turǵyndaryna kómek kórsetýde.
«Іshki ister organdary qujattary jaramsyz adamdardyń Qazaqstanda turý derekterin anyqtap jatyr. Olardyń arasynda KSRO pasporttaryn ýaqytyly almastyrmaǵan Qazaqstan azamattary da, TMD elderiniń merzimi ótken qujattaryn ustap júrgender de bar. Jyl basynan beri 1974 jylǵy úlgidegi KSRO pasporttary ustap júrgen 867 adam, al 2019 jyly - 1 727 adam qujattandyryldy»,- dedi QR ІІM Kóshi-qon qyzmeti komıteti tóraǵasynyń orynbasary Sabyrjan Seıitjanov.
Onyń aıtýynsha, osy jyldyń ózinde Almaty oblysy boıynsha 400 adamnyń qujaty tekserilip, olar Qazaqstan Respýblıkasynyń azamattary dep tanyldy. 3157 sheteldik QR turaqty turýǵa ruqsat alýǵa ótinish berdi, 254 adam jeke basyn kýálandyratyn qujat alýǵa kómek kórsetýdi surady.
«Almaty oblysynda qartaıǵan shaǵynda alǵash ret nemese azamattyǵy joq adamnyń alǵash kýáligin alǵan jaǵdaılar boldy. Jyl sońyna deıin jalǵasatyn aktsııa barysynda ishki ister organdary ÚEU-nyń kómegimen mártebesi rettelmegen adamdardy anyqtaıdy. Sodan keıin kóshi-qon qyzmeti olarǵa mártebelerin anyqtaýǵa kómek kórsetedi jáne QR azamatynyń nemese azamattyǵy joq adamnyń qujattaryn resimdeıdi»,-dep tolyqtyrdy Sabyrjan Seıitjanov.
«Biz bul naýqan elimizdiń barlyq óńirlerin qamtyp, azamattyǵy belgisiz tulǵalar boıynsha naqty statıstıkalyq derekterdi anyqtaýǵa, sondaı-aq qujaty joq adamdarǵa olardyń quqyqtyq mártebesi men quqyqtyq sáıkestigin aıqyndaý jónindegi jaǵdaıdy sheshýge múmkindik beredi dep kútemiz»,- dep qorytyndylady Adam quqyqtary jáne zańdylyqty saqtaý jónindegi Qazaqstandyq halyqaralyq bıýro dırektorynyń orynbasary Denıs Djıvaga.
