Qazaqstanda alǵashqy jol shetindegi meteostansa ornatyldy
ALMATY. QazAqparat - Almatyda tuńǵysh ret jol shetindegi meteostansa ornatyldy. Arnaıy qurylǵy jol qabatynyń jaǵdaıyn baqylap otyrýǵa arnalǵan, dep habarlaıdy QazAqparat tilshisi.
Qala ákimdiginiń baspasóz qyzmeti taratqan aqparatqa sáıkes, qalany ortalyqtandyrý jáne ońtaılandyrý úshin keshendi sheshimderdi iske asyrý sheńberinde Qazaqstanda birinshi bolyp, Almatyda jol jıegindegi Marcel Boschung AG meteostansasyn ornatty.
Stansa Medeý aýdanynda qoıyldy.
«Ekopost qalalyq kommýnaldyq qyzmetterge joldyń ústińgi qabatynyń jaǵdaıy týraly, kórý múmkindigi týraly naqty aqparatty alýǵa, jaýyn-shashyndy eskertýge múmkindik beredi. Sondaı-aq, jolda muzdyń qatýyn boljaýǵa, sol arqyly muzǵa qarsy óńdeý jumystarynyń tıimdiligin arttyrýǵa bolady. Stansa joldyń joǵarǵy qabatynyń temperatýrasyn, jabyndynyń kúıin, tuzdy, muzdyń paıda bolýyn, muzdyń qatýyn, jabyndydaǵy sý qabatynyń qalyńdyǵyn ólsheı alady. Ornatylǵan meteostansa testileý ústinde, 3 km deıingi kórsetkishterdi ólsheıdi. Mundaı qondyrǵylar áýejaılarda, AQSh-tyń iri megapolısterinde, Eýropada sátti jumys istep tur», - dedi baspasóz qyzmetinen.
Almaty qalasynyń kommýnaldyq qyzmetteri atalǵan júıemen jumys isteý kezinde paıdalanyp júrgen muzǵa qarsy materıaldardyń kólemin 20 %- ǵa qysqartýdy kózdep otyr.
