Qazaqstanda alǵashqy Pikirsaıys federatsııasy ashyldy

NUR-SULTAN. QazAqparat – QR Prezıdentiniń janyndaǵy Ortalyq kommýnıkatsııalar qyzmetinde Qazaqstannyń alǵashqy Pikirsaıys federatsııasy resmı tanystyryldy, dep habarlaıdy QazAqparat tilshisi.

Uıym eldegi pikirtalas qozǵalysyn jandandyrýǵa, dodalar ótkizý jáne olardy nasıhattaýǵa, halyqaralyq dodalarǵa qatysatyn jas saıyskerlerdi daıarlaýǵa baǵyttalǵan.

«Jańa uıym Qazaqstanda pikirsaıys qozǵalysyn damytýǵa serpin beredi dep otyrmyz. Qazaq burynnan halqy sýyryp salma aqyndarǵa, qyzyl tildi sheshenderge baı bolǵan, qazirgi urpaq ta sony úlgi etip keledi. Pikirsaıystar kóptegen jastyń mamandyq tańdaýyna kómektesedi. Federatsııa áli jastardyń ómirde ózin tabýyna, ózgelerdi moıyndatýyna kómektesedi dep senemin», - deıdi «Qazaqstan Pikirsaıys Federatsııasy» RQB prezıdenti Bolat Buharbaı.

Sharada saıyskerlerdiń bir-birimen baılanysýyna arnalǵan saıt pen mobıldik qosymsha da tanystyryldy. Ári «Jastar Alany 2019» respýblıkalyq týrnırine qorytyndy jasaldy. Onda úzdik saıysker ataǵyn alý úshin 18-29 jas aralyǵyndaǵy 120 sózýar qatysty.

«Bul oqıǵa eldegi pikirsaıys qoǵamdastyǵyn erekshe qyzyqtyrdy. 133 fraktsııa ótinim berdi, komıssııa sheshimimen 60 fraktsııa týrnırdiń fınalyna qatysty. Oıynshylar men tóreshilerge arnalǵan semınarlar men trenıngterdi de úzbeı ótkizip otyrdyq. Qatysýshylarǵa sertıfıkat berildi, endi olar óz óńirine baryp trenıng ótkize alady», - deıdi «Jas Otan» JQ tóraǵasy Dáýlet Káribek.

Avtory: Áıgerim Ańsaǵanova