Qazaqstanda alǵashqy iri natrıı tsıanıdi zaýytynyń qurylysy bastaldy
TARAZ. KAZINFORM — «Altynalmas» Jambyl oblysynda natrıı tsıanıdyn shyǵaratyn zaýyt qurylysyn bastap, keleshek urpaqqa ǵasyrlyq amanat sandyǵyn saldy.
Jambyl oblysynda jylyna 25 000 tonna ónim beretin qýaty bar natrıı tsıanıdyn shyǵaratyn zaýyttyń irgetasyna ǵasyrlyq amanat sandyǵyn salý saltanatty rásimi ótti. «Altynalmas AK» AQ altyn óndirýshi kompanııasy iske asyryp jatqan bul joba Qazaqstannyń hımııa óndirisi salasyn damytýǵa, jumys oryndaryn ashýǵa, eldiń tehnologııalyq jáne ekonomıkalyq táýelsizdigin nyǵaıtýǵa jasalǵan mańyzdy qadam bolmaq.
Ǵasyrlyq amanat sandyǵyn salý rásimine Jambyl oblysynyń ákimi Erbol Qarashókeev, «Qazaqstan damý banki» AQ basqarma tóraǵasy Marat Elıbaev, «Altynalmas Reagents» JShS bas dırektory Atageldıev Ýalıhan qatysty.
Shamamen 60 mıllıard teńge turatyn jańa zaýyt osyndaı aýqymdaǵy Qazaqstandaǵy alǵash kásiporyn bolady, ımporttalǵan natrıı tsıanıdyna táýeldilikti edáýir tómendetip, altyn óndirý salasynyń qajettiligin jabady, onyń ústine el úshin eksporttyq áleýetti qalyptastyrady.
Jobanyń áleýmettik-ekonomıkalyq yqpaly zor. Zaýytty salý kezinde 400-ge jýyq jumys orny, ol iske qosylǵannan keıin 250-den astam taǵy turaqty jumys orny ashylady. «Altynalmas» zamanaýı hımııalyq óndiriste qyzmetkerlerdi oqytý men daıarlaý júıesine erekshe nazar aýdarady. DuPont/Draslovka tehnologııasyn ustaýshy, sondaı-aq tehnologııalyq seriktes — Glatt tarapynan mindetti oqytý júrgizip, tájirıbeli jergilikti kadrlardy jáne tehnıkalyq JOO túlekterin tartý josparlanýda. Jobany júzege asyrý salyq jáne ózge de mindetti tólemder arqyly jergilikti jáne respýblıkalyq bıýdjetti tolyqtyrýǵa da septigin tıgizedi, bul óz kezeginde el úshin ekonomıkalyq tıimdilikti odan ári arttyrady.
Jańa kásiporynda álem úzdigi DuPont/Draslovka kompanııasynyń tehnologııalary, Glatt Ingenieurtechnik GmbH kompanııasynyń ınjenerlik sheshimderi qoldanylady jáne óndiris tıimdiligi, ónerkásiptik qaýipsizdik jáne qorshaǵan ortany qorǵaý salasyndaǵy eń úzdik qoljetimdi tehnologııalar engiziletin bolady Máselen, tehnıkalyq sýdyń jer bederine múldem shyǵarylmaıtyn tolyq tuıyq aınalym tsıkli nemese qaldyq gazdardy beıtaraptandyrýdyń qoskontýrly júıesi bar. Bul júıe tipti tótenshe jaǵdaılarda da atmosferaǵa shyǵarylatyn zattardyń mólsherin zańnamada belgilengen shekten tómen ustap turady.
«Altynalmas» elishilik qundylyq pen jergilikti quzyretti damytýǵa kóp kóńil bóledi. Máselen, joba boıynsha bas merdiger qazaqstandyq jetekshi ınjınırıngtik kompanııa — AAEngineering Group. Sondaı-aq, joba jergilikti qosalqy jáne standartty emes jabdyqtardy barynsha jergiliktendirý jáne qoldanýdy kózdeıdi.
— Búgin Qazaqstannyń hımııalyq óndirisi men ekonomıkasynyń damýyna eleýli úles qosatyn jobany iske asyrý jolynda mańyzdy qadam jasadyq. Salynyp jatqan zaýyt aldyn óndirýshilerdiń qajettilikterin jaýyp, aımaqqa, keleshek urpaqqa jańa múmkindik beretin, zamanyna saı ári qaýipsiz zaýyt bolmaq, — dep Altynalmas Reagents» JShS bas dırektory Ýalıhan Atageldıev atap ótti.
Bastama Elbasynyń «Ádil Qazaqstannyń ekonomıkalyq baǵdary» atty joldaýynda aıqyndalǵan maqsattarǵa saı keledi, ol joldaýda el ishindegi óńdeý ónerkásibi men qosymsha quny joǵary óndiristerdi údemeli damytýǵa erekshe kóńil bólingen.
Jobany júzege asyrý aralyq salalardyń damýyna serpin beredi.
Hımııalyq ónerkásipte ammıak pen kúıdirgish (kaýstıkalyq) sodanyń óndirisi edáýir artýy kútilýde, bul óz kezeginde elde tek qazaqstandyq shıkizatty tutyný esebinen óndiristik tsıkldi tolyq «jabý» múmkindigin beredi.
Bul otandyq kompanııalardyń ónimderine qosymsha suranys týdyrady jáne jeke kásipkerlik úshin jańa múmkindikter ashady. Mundaı tásil ónerkásiptik negizdi nyǵaıtyp, Qazaqstanda shıkizatty óńdeý kólemin ulǵaıtady jáne hımııalyq ónerkásiptiń birqatar baǵyttarynyń damýyna úles qosady.
Mundaı óndiristerdiń qurylýy ishki naryqty da kúsheıtedi, sebebi ónimder negizinen qazaqstandyq jetkizýshilerden satyp alynatyn bolady, bul óz kezeginde otandyq kásiporyndardyń qosymsha júktemesin qamtamasyz etedi jáne ekonomıkanyń jalpy ósýine yqpal etedi.
Joba «Altynalmas AK» AQ óz qarajaty esebinen, Qazaqstan Damý Bankinen alynatyn nesıeden, Deutsche Bank jáne Euler Hermes sekildi halyqaralyq jáne qazaqstandyq qarjy ınstıtýttarynyń qatysýymen qarjylandyrylady.
«Altynalmas AK» AQ ulttyq óndiristik áleýetti damytýǵa, asa tehnologııaly zamanaýı kásiporyndar qurýǵa, Qazaqstannyń turaqty ekonomıkalyq bolashaǵyn nyǵaıtýǵa baǵyttalǵan ındýstrıaldy jobalardy iske asyrýdy jalǵastyryp jatyr.