Qazaqstanda alǵashqy memlekettik jeke ortezder óndirisi iske qosylady
ASTANA. KAZINFORM — Aldaǵy úsh jyl ishinde 3 myńǵa jýyq azamat zamanaýı ortezdermen qamtamasyz etiledi, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.
Sala basshysy Asqarbek Ertaev Almaty qalasynda elimizdegi alǵashqy memlekettik ortezderdi modeldeý jáne óndirý zerthanasynyń jobasymen tanysty.
Áleýmettik qorǵaý salasyn damytýdyń ulttyq ǵylymı ortalyǵynyń bas dırektory Syrym Násı mınıstrge zerthana jobasyn tanystyrdy.
Zerthanany iske qosý 2026 jylǵy 1 qazanǵa josparlanǵan. Zerthana zamanaýı tsıfrlyq tehnologııalardy paıdalana otyryp, jeke ortezderdi daıyndaýdyń tolyq tsıklin qamtamasyz etedi.
Ortez — deneniń belgili bir bóligin (qol, aıaq, tize, omyrtqa, moıyn, t. b.) bekitýge, qoldaýǵa nemese durys qalypta ustaýǵa arnalǵan medıtsınalyq qural.
Qazirgi tańda mundaı ortezderdi negizinen jekemenshik kompanııalar óndiredi, sondyqtan olardyń baǵasy kóp azamattar úshin qoljetimsiz bolýy múmkin. Memlekettik zerthananyń ashylýy azamattardy joǵary tehnologııalyq ortezdermen memleket esebinen qamtamasyz etýge múmkindik beredi.
Jospar boıynsha:
2026 jyldyń sońyna deıin — 500 ortez;
2027 jyly — 1 000 ortez;
2028 jyly — 1 500 ortez daıyndalady.
Osylaısha, úsh jyl ishinde 3 myńǵa jýyq azamat zamanaýı ortezdermen qamtamasyz etiledi.
— Áleýmettik qorǵaý salasyn damytýdyń ulttyq ǵylymı ortalyǵy zamanaýı ońaltý tehnologııalaryn engizetin jetekshi ǵylymı-praktıkalyq alańǵa aınalýy tıis. Ortezderdi modeldeý jáne óndirý zerthanasyn ýaqytyly iske qosyp, ońaltý úderisterin odan ári tsıfrlandyrýdy, sondaı-aq kohlearlyq ımplantatsııadan keıin balalardyń estý-sóıleý ońaltý júıesin damytýdy jalǵastyrý mańyzdy, — dep atap ótti Asqarbek Ertaev.
Budan buryn elordada medıtsınalyq buıymdardy tehnıkalyq saraptamadan ótkizetin zerthana salynatynyn jazǵanbyz.
