Qazaqstanda alǵashqy kómirtekti agroklımattyq polıgon «Kaz Agro Carbon» quryldy
ASTANA.KAZINFORM - «A.I. Baraev atyndaǵy astyq sharýashylyǵy ǵylymı-óndiristik ortalyǵy» JShS bazasynda elimizdegi alǵashqy kómirtekti agroklımattyq polıgon – «Kaz Agro Carbon» ashyldy. Bul týraly Aýyl sharýashylyǵy mınıstrligi habarlady.
Ashylý rásimine QR Aýyl sharýashylyǵy mınıstrliginiń, QR Prezıdenti janyndaǵy Ulttyq ǵylym akademııasynyń, Reseı Federatsııasy Aýyl sharýashylyǵy mınıstrliginiń ókilderi, BUU Azyq-túlik jáne aýyl sharýashylyǵy uıymynyń (FAO) sarapshylary, Gannover ýnıversıtetiniń ǵalymdary, ǵylymı jáne bilim berý uıymdarynyń basshylary, bıznes qaýymdastyq ókilderi, otandyq jáne sheteldik zertteýshiler, sondaı-aq fermerler qatysty.
Joba Qazaqstan men Reseı Aýyl sharýashylyǵy mınıstrlikteriniń jáne QR Prezıdenti janyndaǵy Ulttyq ǵylym akademııasynyń qoldaýymen, otandyq jáne sheteldik ǵalymdardyń, aýyl sharýashylyǵy qurylymdary, salalyq uıymdar basshylarynyń qatysýymen júzege asyrylyp jatyr.
Polıgonnyń ashylýy qazaqstandyq-reseılik agroónerkásip keshenindegi ozyq tehnologııalar ortalyǵynyń qyzmeti sheńberinde ótti. Ol QR Ulttyq ǵylym akademııasy men Reseı ǵylym akademııasynyń Agroekologııa federaldyq ǵylymı ortalyǵy arasyndaǵy yntymaqtastyq týraly memorandým aıasynda qurylǵan bolatyn.
Kómirtekti polıgondardy qurýdyń maqsaty – topyraqtaǵy kómirtekti basqarý, parnıktik gazdar shyǵaryndylaryn azaıtý jáne agrarlyq sektordyń klımattyq turaqtylyǵyn arttyrý salalarynda Qazaqstan men Reseı arasyndaǵy ǵylymı yqpaldastyqty nyǵaıtý.
«Kaz Agro Carbon» polıgony kómirtek teńgerimin ólsheý, modeldeý jáne basqarý boıynsha birlesken zertteýler júrgizýge arnalǵan pılottyq alańǵa aınalady. Eki eldiń ǵalymdary Soltústik Qazaqstan ekojúıelerinde kómirqyshqyl gazynyń shyǵarylýyn azaıtý jáne sińirilýin arttyrýǵa baǵyttalǵan ınnovatsııalyq tehnologııalardy ázirlep, engizýdi josparlap otyr.
– Kómirtekti agroklımattyq polıgon «Kaz Agro Carbon»-nyń qurylýy – turaqty aýyl sharýashylyǵynyń jańa modelin qalyptastyrý jolyndaǵy strategııalyq qadam. Bul joba Qazaqstan men Reseı arasyndaǵy ǵylymı yntymaqtastyqty damytyp, agroóndiristegi kómirtek izin azaıtýǵa baǵyttalǵan tájirıbelik sheshimderdi engizýge múmkindik beredi, – dedi Ulttyq agroónerkásiptik ǵylymı-oqytý ortalyǵynyń basqarma tóraǵasy Baýyrjan Asanov.
– Kómirtekti polıgon – ǵylym, ınnovatsııa jáne naqty óndiristi biriktiretin alań. Ol topyraqtyń qunarlylyǵyn saqtaýǵa, aýyl sharýashylyǵyn klımattyń ózgerýine beıimdeýge jáne kómirtek teńgerimin basqarýdyń ulttyq júıesin qalyptastyrýǵa jol ashady. Bul – Qazaqstanda klımatqa baǵyttalǵan eginshilikti damytýdyń mańyzdy qadamy, – dedi «A.I. Baraev atyndaǵy astyq sharýashylyǵy ǵylymı-óndiristik ortalyǵy» basqarma tóraǵasy Tımýr Savın.
Aıta keteıik, Alataý polıgonynda órt sóndirgen qyzmetkerler marapattaldy.