Qazaqstanda alǵashqy halyqaralyq aýtlet ortalyǵy salynady
ASTANA. KAZINFORM — Astanada ótken Halyqaralyq forým (AIF) aıasynda elimizde alǵashqy halyqaralyq aýtlet-ortalyǵyn salý týraly bas kelisimge qol qoıyldy. Aýqymdy joba Almaty oblysynda QSM tobynyń bastamasymen júzege asyrylady.
Jobanyń strategııalyq seriktesi retinde kommertsııalyq jyljymaıtyn múlik naryǵynda 60 jyldan astam tájirıbesi bar avstrııalyq Ekazent Management GmbH kompanııasy tańdaldy. Kelisimge qol qoıý rásimine Saýda jáne ıntegratsııa mınıstri Arman Shaqqalıev qatysty.
Kelisim aıasynda Ekazent Management GmbH kompanııasy aýtlet-ortalyqty ornalastyrýǵa eń qolaıly oryndy anyqtaý maqsatynda marketıngtik zertteý júrgizedi. Sondaı-aq bolashaq ortalyqtyń arhıtektýralyq jáne operatsııalyq tujyrymdamasyn ázirlep, basqarý strategııasyn qalyptastyrady. Nysan iske qosylǵannan keıin onyń kúndelikti operatsııalyq basqarýyn da kompanııa óz moınyna alady. Budan bólek, kompanııa halyqaralyq brendter men jalǵa alýshylardy barlyq kommertsııalyq alańǵa tartýmen aınalysady.
Jalpy aýdany 80 000-nan 120 000 sharshy metrdi qamtıtyn aýtlet-ortalyq aýmaǵynda saýda galereıalary, qonaqúıler, qoǵamdyq tamaqtaný oryndary, balalarǵa arnalǵan oıyn alańdary men basqa da qajetti ınfraqurylymdyq nysandar ornalaspaq.
— Bul jobanyń iske asyrylýy Qazaqstannyń bólshek saýda salasyna jańa serpin beredi. Qazirgi tańda Ortalyq Azııada batystyq úlgidegi aýtlet-ortalyqtar joq, bul — elimiz úshin erekshe básekelestik artyqshylyq. Qazaqstandyq tutynýshylar brendtik taýarlarǵa erekshe qyzyǵýshylyq tanytyp, sán men lifestyle mádenıetin joǵary baǵalaıdy. Sonymen qatar, Almaty oblysynyń Ózbekstan men Qyrǵyzstan astanalaryna jaqyn ornalasýy, Qytaı, Túrkııa, BAÁ jáne Reseı baǵytyndaǵy logıstıkalyq dálizderdiń qıylysynda ornalasýy óńirdiń kólik-logıstıkalyq áleýetin arttyrady, — dedi Arman Shaqqalıev.
Aýtlet-ortalyq tek jergilikti turǵyndar úshin ǵana emes, sheteldik týrıster úshin de tartymdy orynǵa aınalady. Kórshiles elderden keletin shopıng-týrısterdiń aǵymy óńirdiń ekonomıkalyq jáne tutynýshylyq belsendiligin edáýir arttyrýǵa yqpal etpek.
— Meniń oıymsha, Qazaqstan — ásirese Astana men Almaty qalalary — Ortalyq Azııadaǵy eń qyzyqty óńirlerdiń biri. Bul aımaq týrızm men bólshek saýdany damytýda zor áleýetke ıe. Bizdiń kompanııa halyqaralyq naryqta keńeıýdi maqsat etedi. Qazaqstanda Avstrııamen tyǵyz baılanysy bar senimdi seriktestermen tanysýymyz osy erekshe jobanyń bastamasyna túrtki boldy. Jobany aldaǵy eki jyl ishinde tolyq aıaqtaımyz dep josparlap otyrmyz, — dedi The College Group kompanııasynyń operatsııalyq dırektory Ýıll Kıffer.
Ekazent Management GmbH kompanııasy basqarǵan Parndorf Fashion Outlet (Avstrııa) jáne Freeport Fashion Outlet (Chehııa–Avstrııa) syndy aýqymdy jobalar bul jobanyń da joǵary halyqaralyq standarttarǵa saı bolýyn qamtamasyz etedi. Atalǵan ortalyqtar jyl saıyn mıllıondaǵan kelýshini qabyldaıdy. Al aýtlet formaty jahandyq ekonomıkalyq turaqsyzdyq jaǵdaıynda da óziniń tıimdiligin kórsetip keledi.
Qazirgi tańda álemdik aýtlet-rıteıl naryǵynyń kólemi 100 mıllıard AQSh dollarynan asyp jyǵylady. Jyl saıyn bul naryq orta eseppen 5–7 paıyzǵa ósip otyr. Bul ósim ásirese Azııa elderinde aıqyn baıqalady. Aýtlet formattarynyń tanymaldyǵy brendtik ónimderdi tómen baǵada usynýymen, týrızm men shopıng-týrızmniń artýymen, sondaı-aq daǵdarys jaǵdaılarynda tutynýshylardyń baǵaǵa sezimtaldyǵymen túsindiriledi.
Qazaqstandaǵy bul biregeı joba QSM tobyna qarasty «Multibrand Holding» kompanııasy arqyly júzege asyrylady. Top quramyna elimizdegi CFBO (Centralized Fulfillment by Operator) modelinde jumys isteıtin alǵashqy marketpleıs — TEEZ, onlaın-gıpermarket Clever jáne Clever Distribution atty FMCG ónimderiniń dıstrıbıýtory kiredi. Tsıfrlyq logıstıka men halyqaralyq developerlik tájirıbeniń úılesýi bul jobanyń tabysty bolýyna zor múmkindik beredi.
Aıta ketelik Qazaqstan men Aýǵanstan saýda-ekonomıkalyq yntymaqtastyqty nyǵaıtatyny týraly jazǵan edik.