Qazaqstanda alǵashqy ákimshilik raqymshylyqtan kimder tys qalýy múmkin

ASTANA. KAZINFORM — Memleket basshysy Qasym-Jomart Toqaev 17 naýryzda Qazaqstan Respýblıkasynyń jańa Konstıtýtsııasynyń qabyldanýyna baılanysty amnıstııa júrgizýge bastamashylyq jasady, dep habarlaıdy ІІM baspasóz qyzmeti.

Bul shara azamattar men memlekettiń qaýipsizdigine qater tóndirmeıtin jekelegen qylmystyq jáne ákimshilik quqyq buzýshylyqtar jasaǵan tulǵalarǵa qatysty qoldanylady.

El tarıhynda alǵash ret ákimshilik amnıstııa ótkizý qarastyrylyp otyr. Onyń aıasynda jeke tulǵalardyń oryndalmaǵan ákimshilik aıyppuldaryn tolyq nemese ishinara esepten shyǵarý máselesi qaralady.

Qazirgi ýaqytta Іshki ister mınıstrligi Ádilet mınıstrligimen birlesip, amnıstııany júzege asyrý tetikterin ázirleýde. Quqyq buzýshylyq túrleri, amnıstııa qoldanylatyn tulǵalar sanaty, aıyppuldardy esepten shyǵarý kólemi men tártibi tıisti zań jobasyn ázirleý barysynda naqtylanady.

— Amnıstııa eń qaýipti qylmystardy jasaǵan tulǵalarǵa qoldanylmaıdy. Olardyń qataryna terrorıstik, ekstremıstik jáne sybaılas jemqorlyq qylmystar, kámeletke tolmaǵandardyń jynystyq qol suǵylmaýshylyǵyna qarsy qylmystar, sondaı-aq azaptaý faktileri jatady. Budan bólek, ol qaıtalama qylmys jasaǵandarǵa jáne ádil sottan jaltaryp júrgen adamdarǵa qoldanylmaıdy, — delingen habarlamada.

Amnıstııa júrgizý týraly zańdy parlamenttik sessııanyń sońyna deıin qabyldaý josparlanyp otyr.

Keshe Premer eki aptada raqymshylyq jasaý tetikteri boıynsha usynys ázirleýdi tapsyrdy.

Buǵan deıin jańa Konstıtýtsııa 1 shildeden bastap resmı túrde kúshine enetinin jazdyq.