Qazaqstanda alǵashqy AI kabınet – Astanadaǵy mektepterdiń birinde ashylady
ASTANA. KAZINFORM — Elordadaǵy №101 Keleshek mektebinde jasandy ıntellekt tehnologııalaryna negizdelgen pılottyq AI kabınet ashylady. Oqýshylarǵa arnalǵan bul zamanaýı kabınet oqý protsesin tsıfrlyq sheshimder arqyly jaqsartýǵa jáne sabaqtyń sapasyn derekter negizinde taldaýǵa baǵyttalǵan. Mundaı formattaǵy AI kabınet Qazaqstanda alǵash ret qoldanysqa engizilmek. Bul týraly Oqý-aǵartý mınıstrligi málim etti.
— Keleshek mektebindegi AI Interactive Smart Classroom kabınetinde beınebaqylaý men aýdıoanalıtıka júıeleri ornatylǵan. Bul taldaý júıeleri sabaq kezinde oqýshylardyń belsendiligin, nazaryn jáne synyptaǵy jalpy jaǵdaıdy taldap, muǵalimge jedel aqparat beredi. Sonyń arqasynda muǵalim sabaqty naqty jaǵdaıǵa qaraı beıimdeı aladyǵ, — delingen habarlamada.
Jınalǵan derekter jasandy ıntellekt arqyly óńdelip, ár sabaq boıynsha qysqasha taldaý jasalady. Bul muǵalimderge qaı taqyryp qıyn ekenin nemese qaı tusta qyzyǵýshylyqtyń tómendeıtinin anyqtaýǵa kómektesedi. Barlyq aqparat tek bilim berý maqsatynda paıdalanylady.
Kabınet zamanaýı tsıfrlyq qurylǵylarmen jabdyqtalǵan. Interaktıvti panelder men joǵary ónimdi esepteý júıeleri sabaqtardy kórneki ári túsinikti etýge múmkindik beredi.
Sonymen qatar mektepte oqýshylarǵa drondardy basqarý úıretiledi. Oqýshylar drondy ushyrýmen qatar, ony baǵdarlamalap, túrli tapsyrmalarǵa beıimdeýdi meńgeredi. Olar óz jobalaryn jasap, nátıjesin birden kórip, taldaı alady. Bul teorııa men praktıkany qatar ushtastyrýǵa jol ashady.
№ 101 mektep ókilderiniń aıtýynsha, joba muǵalimderge naqty kómek berip, oqytý úderisin jeńildetýge jáne jetildirýge baǵyttalǵan. Aldaǵy ýaqytta kabınet pılottyq rejımde synaqtan ótedi.
Aıta keteıik, bul mektep- zamanaýı formatta salynǵan bilim berý uıymdarynyń biri. Munda tsıfrlyq tehnologııalar, STEM baǵyttary jáne tájirıbelik oqytý keńinen engizilgen.
Aıta keteıik, buǵan deıin Astanada oqýshylar smart partalarda bilim ala bastaǵanyn jazdyq.