Qazaqstanda alǵashqy AES salatyn halyqaralyq konsortsıýmnyń kóshbasshysy anyqtaldy
ASTANA. KAZINFORM — QR Atom energııasy jónindegi agenttigi halyqaralyq sarapshylardyń qatysýymen elimizdegi alǵashqy atom elektr stantsııasyn (AES) salýǵa arnalǵan konsortsıým kóshbasshysyn aıqyndaý jumysyn aıaqtady.
Ashyq jáne básekege qabiletti dıalog aıasynda reaktorlyq tehnologııalardyń jetekshi álemdik óndirýshilerimen kelissózder júrgizilip, olardyń óndiristik nysandaryna saparlar uıymdastyryldy.
Atqarylǵan jumystardyń nátıjesinde áleýetti jetkizýshilerdiń «qysqa tizimine» kelesi kompanııalar endi: «Rosatom» (Reseı), «China National Nuclear Corporation» (Qytaı), «Électricité de France» (Frantsııa) jáne «Korea Hydro & Nuclear Power» (Ońtústik Koreıa).
Tizimge engen kompanııalar Qazaqstanda AES salý boıynsha tehnıkalyq jáne kommertsııalyq usynystardan turatyn materıaldardyń keshendi paketin usyndy. Bul materıaldarda kelesi málimetter qamtyldy:
- qurylystyń boljamdy quny;
- jobany iske asyrý merzimderi;
- qarjylandyrý tartý modelderi;
- jabdyqtar men qurylys jumystaryn jergiliktendirý tásilderi;
- kadr daıarlaý men ǵylymı-bilim berý áleýetin damytý boıynsha usynystar;
- ıadrolyq otyn tsıklindegi yqpaldastyq múmkindikteri;
- áleýmettik mindettemeler máseleleri.
Nátıjesinde, QR Atom energııasy jónindegi agenttigi, «Qazaqstandyq atom elektr stantsııalary» JShS jáne frantsýzdyq Assystem ınjenerlik kompanııasy birlesip ázirlegen ádisteme negizinde usynylǵan reaktorlyq tehnologııalar men basqa da usynystarǵa keshendi baǵalaý júrgizildi.
Baǵalaý AES qaýipsizdigi, tehnologııalyq jáne qarjylyq aspektiler, halyqaralyq tájirıbe, kadrlar daıarlyǵy, jergiliktendirý deńgeıi jáne ózge de kórsetkishter boıynsha júzege asyryldy.
- Osy taldaýdyń nátıjeleri atom salasyn damytý máseleleri jónindegi vedomstvoaralyq komıssııanyń qaraýyna usynyldy jáne Qazaqstanda AES salý boıynsha eń ońtaıly ári tıimdi usynystar reseılik «Rosatom» kompanııasynan kelgeni anyqtaldy. Ekinshi orynǵa qytaılyq «China National Nuclear Corporation» jaıǵassa, frantsýzdyq «Électricité de France» pen koreıalyq «Korea Hydro & Nuclear Power» usynystary úshinshi oryndy ıelendi, - dep jazdy agenttikten.
Osylaısha, «Rosatom» kompanııasy Qazaqstandaǵy alǵashqy atom elektr stantsııasyn salý jobasy boıynsha halyqaralyq konsortsıýmnyń kóshbasshysy retinde anyqtaldy.
Qazirgi ýaqytta «Rosatom» usynǵan usynystar negizinde Reseı Federatsııasy tarapynan memlekettik eksporttyq qarjylandyrý tartý máselesi pysyqtalýda.
Qazaqstan Respýblıkasynyń Atom energııasy jónindegi agenttigi elimizdegi alǵashqy atom elektr stantsııasynyń qurylysyn júzege asyratyn tıimdi halyqaralyq konsortsıýmdy qalyptastyrý boıynsha sheteldik áriptesterimen jumysty jalǵastyrady.
Aıta keteıik, «Rosatom» Ózbekstandaǵy AES-ke qajetti jabdyqtardy ázirleýge kiriskenin jazǵanbyz.