Qazaqstanda alǵash ret júrekke robottandyrylǵan operatsııa jasaldy
ASTANA. KAZINFORM — QR Prezıdenti Іs basqarmasy Medıtsınalyq ortalyǵynyń aýrýhanasynda el tarıhynda jáne Ortalyq Azııada alǵash ret júrekke robottandyrylǵan tehnologııa arqyly ota sátti jasaldy, dep habarlaıdy mekemeniń baspasóz qyzmeti.
Bul operatsııany Medıtsınalyq ortalyq aýrýhanasynyń kardıohırýrgteri Qytaıdan kelgen mamandar tobymen birlese otyryp, Halyqaralyq ǵylymı-tájirıbelik konferentsııanyń aıasynda júzege asyrdy.
— Týa bitken júrek aqaýy — júrekshelik perde aqaýy bar 28 jastaǵy naýqasqa sońǵy úlgidegi robottandyrylǵan hırýrgııalyq júıe arqyly ota jasaldy. Operatsııa dástúrli ádis — sternotomııasyz, ıaǵnı keýde súıegin ashpaı, shaǵyn tilik arqyly júrgizildi. Qazirgi ýaqytta naýqastyń jaǵdaıy qalypty, — delingen habarlamada.
Medıtsınalyq ortalyqtyń málimdeýinshe, bul operatsııa — joǵary tehnologııaly kardıohırýrgııany damytý men medıtsına salasyndaǵy halyqaralyq yntymaqtastyqty nyǵaıtý jolyndaǵy mańyzdy qadam boldy.
Aıta ketý kerek, konferentsııa aıasynda halyqaralyq mamandardyń konsýltatsııasy ótti. Medıtsına ǵylymdarynyń doktory, kardıolog ári fýnktsıonaldy dıagnostıka mamany (Máskeý) Olga Djıoeva Medıtsınalyq ortalyq aýrýhanasynyń kardıolog mamandarymen birge naýqastardy qabyldasa, Japonııadan kelgen dáriger, Áýlıe Marııa aýrýhanasy gematologııa bóliminiń meńgerýshisi, professor Jeon Yungwoo toǵyz patsıentke konsýltatsııa ótkizdi.
Esterińizge salsaq, Astanada ótken iri Halyqaralyq ǵylymı-tájirıbelik konferentsııa óz jumysyn aıaqtady. Baǵdarlama kardıohırýrgııa, onkologııa, ıadrolyq medıtsına, neırohırýrgııa, terapııa, tsıfrlandyrý, farmatsevtıkalyq retteý, meıirbıkelik is, kóshbasshylyq pen medıtsınalyq kómektiń sapasyn basqarý sııaqty ózekti taqyryptardy qamtydy.
Forýmnyń jumysyna jetekshi klınıkalar, Qazaqstandaǵy ǵylymı ınstıtýttar men ýnıversıtetterdiń ókilderi, sondaı-aq onnan asa elden kelgen sheteldik sarapshylar qatysty.
Konferentsııa tájirıbe almasý, ınnovatsııalyq medıtsınalyq jáne bilim berý tehnologııalaryn damytý alańyna aınaldy.
Barlyǵy tórt myńǵa jýyq adam konferentsııanyń onlaın jáne oflaın formattaryndaǵy is-sharalaryna qatysty. Sessııalardyń tikeleı translıatsııalaryn qaraý sany tórt myńnan asty.