Qazaqstanda alǵash ret jylyna 25 myń tonna balyq jemin óndiretin zaýyt salynady
ASTANA. KAZINFORM – Qazaqstanda alǵash ret ekstrýdırlengen balyq jemin óndiretin zaýyt qurylysy bastaldy.
QR Aýyl sharýashylyǵy mınıstrliginiń qoldaýymen júzege asyrylyp jatqan jobanyń óndiristik qýattylyǵy jylyna 25 myń tonnany quraıdy.
Jańa kásiporyn akvasharýashylyq salasyn damytýǵa, ımportqa táýeldilikti azaıtýǵa jáne otandyq óndiris áleýetin arttyrýǵa baǵyttalǵan.
– Búginde Qazaqstanda taýarlyq balyq óndirisi turaqty ósip keledi. 2025 jyldyń qorytyndysy boıynsha 23 myń tonnaǵa jýyq balyq ósirildi, onyń shamamen 4 myń tonnasy – forel. 2026 jyly óndiris kólemin 64,7 myń tonnaǵa deıin jetkizý josparlanyp otyr, – dep habarlady Aýyl sharýashylyǵy mınıstrliginen.
Vedomstvo málimetinshe, elimizdegi balyq sharýashylyqtarynyń jyldyq jem qajettiligi shamamen 72 myń tonnany quraıdy. Onyń negizgi bóligi otandyq óndirispen qamtamasyz etilgenimen, joǵary proteındi jem túrleri boıynsha ımportqa táýeldilik saqtalyp otyr.
Ásirese forel men bekire sııaqty kommertsııalyq mańyzy joǵary balyqtarǵa arnalǵan joǵary tehnologııalyq jemder elimizde óndirilmeıdi.
– Jańa zaýyt akvasharýashylyq kásiporyndaryn sapaly ónimmen qamtamasyz etýge múmkindik beredi. Joba otandyq akvasharýashylyq salasynyń básekege qabilettiligin arttyryp, azyq-túlik qaýipsizdigin nyǵaıtýǵa jáne óńirlerde jańa jumys oryndaryn ashýǵa úles qosady, – dep atap ótti mınıstrlikten.
Aıta keteıik, Qazaqstanda balyq ónimderi naryǵy 106 myń tonnadan asty.
