Qazaqstanda alǵash ret WTA 250 týrnıri ótedi
NUR-SULTAN. QazAqparat – Bir aıdan keıin Qazaqstanda Áıelder tennıs qaýymdastyǵynyń (WTA) iri jarysy ótedi, dep habarlaıdy QazAqparat tilshisi.
Qazaqstan tennıs federatsııasy málim etkenindeı, 26 qyrkúıek – 2 qazan aralyǵynda Nur-Sultandaǵy Ulttyq tennıs ortalyǵynda qatysýshylar týrnırdiń bas júldesi men 250 reıtıng upaı úshin talasady.
Atalmysh doda álemniń 70-ten astam elinde kórsetiledi.
Astana Open WTA 250 týrnıriniń dırektory Pıter Djonstonnyń sózine qaraǵanda, eki apta boıy tennıs juldyzdary elordada baq synaıdy. Aldymen erler arasynda ATP 250 týrnıri ótedi. Sodan keıin birden áıelderdiń WTA 250 jarysy bastalady.
Buǵan Qazaqstan ulttyq quramasynyń barlyq kóshbasshy tennısshileri qatysady. Sonymen qatar atalmysh eki jarystyń aldynda ótetin el chempıonatynda jeńimpaz atanǵandar negizgi týrnırge, fınalıster irikteý saıystaryna joldama alady.
Eske sala keteıik, budan buryn Astana Open ATP 250 jarysyna kimderdiń qatysatyny belgili bolǵanyn, Mıhaıl Kýkýshkın US Open jarysynyń irikteý saıysyn jeńispen bastaǵanyn jazǵan bolatynbyz.
