Qazaqstanda alǵash ret uıymdastyrylǵan «Jastar uıymdarynyń netvorkıngi» jobasy márege jetti
NUR-SULTAN. QazAqparat - «Bolashaq» Qaýymdastyǵynyń uıymdastyrýymen «Jastar uıymdarynyń netvorkıngi jáne tájirıbe almasýy» jobasy óz máresine jetti, dep habarlaıdy QazAqparat.
Qazaqstannyń 17 aımaǵyn qamtyǵan jobaǵa jalpy sany 1000-nan astam belsendi jas, úkimettik emes uıymdar men jastar resýrstyq ortalyǵy ókilderi qatysty.
Jastar jylyndaǵy eń iri jobalardyń biri elimizdiń bas qalasy Nur-Sultanda bastaý alyp, Oral, Almaty, Shymkent jáne Pavlodar qalalarynda jalǵasty. Qatysýshylar jastar saıasatyndaǵy mańyzdy máseleler, bıznes bastaýdaǵy negizgi qaǵıdalar men jastar ÚEU tıimdiligin arttyrý máselelerin talqylady. Sondaı-aq, olar ózara tájirıbe almasyp, pikir bólisip, jańa jobalardy birlese júzege asyrý joldaryn pysyqtady.
Shara aıasynda Nur-Sultanda Qazaqstan-AQSh jastarynyń forýmy uıymdastyryldy. AQSh-tan arnaıy kelgen azamattar spıkerler qatarynda bolyp, netvorkıngke belsene aralasty. Olar Amerıka jastar saıasatyndaǵy ózekti máselelerdi talqylap, óz tájirıbelerindegi basty artyqshylyqtardy tilge tıek etti. Spıkerler álemde jastar arasyndaǵy túıtkildi problemalar bir-birine uqsas ekenin aıta kelip, ony sheshý jolynda álem jastary kúsh biriktirý qajettigin atap ótti. Sondaı-aq eki el arasyndaǵy yntymaqtastyqty nyǵaıtý maqsatynda birlesken jobalar uıymdastyrýǵa nıet bildirdi.
«Bir aı kóleminde uıymdastyrylǵan sharaǵa elimizdiń eń belsendi jastary qatysty. Sharanyń aty aıtyp turǵandaı, netvorkıng – jastardy bir arnaǵa toǵystyratyn úlken alań. Joba aıasynda jastar úshin túrli semınar, terenıg, master-klasstar uıymdastyryldy. Onda jastardyń keleshekte tabysty qyzmet atqarýyna óz septigin tıgizetin mańyzdy aqparattar aıtyldy dep oılaımyn. Osyndaı múmkindikti paıdalanyp, sharaǵa belsendi atsalysqan barsha qatysýshylarǵa jáne jastarmen pikir almasyp, ózderiniń ómirdegi jáne qyzmettegi ozyq tájirıbesin bólisken spıkerlerge erekshe alǵysymdy aıtamyn», - deıdi «Bolashaq» Qaýymdastyǵynyń atqarýshy dırektory Laýra Demesinova
17 aımaqty qamtyǵan netvorkıngke elimizge tanymal spıkerler de qatysty. Naqtyraq aıtsaq, aımaq basshylary, jastar saıasatynda belsendi qyzmet atqaryp júrgen kóshbasshy azamattar, tanymal telejúrgizýshiler, blogerler, «Bolashaq» baǵdarlamasy túlekteri jáne belgili kásipkerler semınar-trenıngter ótkizdi.
Atap aıtsaq, sharaǵa qatysqan Nur-Sultan qalasy ákimi orynbasary, «Bolashaq» Qaýymdastyǵy Keńesiniń Tóraǵasy Baqtııar Máken, Shymkent qalasy ákimi Erlan Aıtahanov, Batys Qazaqstan oblysy ákiminiń orynbasary Amanjol Alpysbaev, Pavlodar oblysy ákiminiń orynbasary Ashat Oralov taqyryp tóńireginde oılaryn ortaǵa salyp, jastarmen erkin formatta pikir almasty.
Sharaǵa qatysýshylar elimizde alǵash ret uıymdastyrylyp jatqan jobaǵa qoldaý bildirip, aldaǵy ýaqytta turaqty túrde uıymdastyrylyp tursa degen usynys bildirdi.
Esterińizge sala ketsek, «Bolashaq» Qaýymdastyǵy atalǵan jobany QR Aqparat jáne qoǵamdyq damý mınıstrliginiń qoldaýymen, «Azamattyq bastamalardy qoldaý ortalyǵy» KEAQ-nyń memlekettik granty sheńberinde uıymdastyrdy.
