Qazaqstanda alǵash ret úshtik aıqas búırek transplantatsııasy jasaldy
ASTANA. KAZINFORM — Otandyq medıtsına tarıhynda tuńǵysh A. N. Syzǵanov atyndaǵy ulttyq ǵylymı hırýrgııa ortalyǵy bazasynda professor Bolatbek Baımahanovtyń jetekshiligimen transplantolog dárigerler komandasy búırekti úshtik aıqas transplantatsııa jasady.
— Bir kúnde 12 saǵat boıy medıtsınalyq kórsetilimder boıynsha týys emes patsıentter arasynda úsh donorlyq operatsııa jáne úsh búırekti transplantatsııa júrgizildi. Aıqas donorlyq ádisiniń arqasynda olardyń árqaısysy jańa ómirge múmkindik aldy. Búırekti aıqas transplantatsııalaý bir ýaqytta birneshe aǵzany aýystyrýǵa múmkindik beredi jáne týys emes donorlar men retsıpıentterdiń arasynda júrgizildi. Basqasha aıtqanda, týysqan donor jaqyn adamyna qan nemese tindik úılesimsizdikke baılanysty kómektese almasa, dárigerler uqsas jaǵdaıy bar basqa otbasyn tabady. Eger juptar bir-birine sáıkes kelse, aıyrbas jasalady jáne ota jasaý múmkin bolady, — dep habarlaıdy Densaýlyq saqtaý mınıstrligi.
Aqparatta aıtylǵandaı, Qazaqstan búırek transplantatsııasy boıynsha joǵary tehnologııalyq aralasý júrgizilip jatqan álemniń alty eldiń qataryna kirdi. AQSh, Ulybrıtanııa, Izraıl, Túrkııa jáne Úndistanmen qatar bizdiń elimiz transplantologııanyń damýynyń joǵary deńgeıin kórsetedi. Álemde 7 donor men 7 retsıpıent qatysqan eń úlken búırekti aýystyrý 2019 jyly Túrkııada jasalǵa.
— Bul tájirıbe — qazaqstandyq transplantologııany damytýda mańyzdy. 2022 jyly «University medical center» korporatıvtik qorynda (Astana) alǵash balalarǵa búırekti transplantatsııa jasaldy. Bir sátte 4 zalda ota jasaldy, al donorlar jas patsıentterdiń analary boldy. 2024 jyly A. N. Syzǵanov atyndaǵy UǴHO-da professor Baımahanovtyń jetekshiligimen alǵash ret eresek patsıentterge búırekti transplantatsııa júrgizildi. Sátti júrgizilgen operatsııalardan bastap baǵdarlamaǵa qatysatyn juptardyń sany jyl saıyn artyp keledi. Endi el tarıhyndaǵy alǵashqy úshtik operatsııa jasaldy, — delingen habarlamada.
Osylaısha vedomstvo búginde elimizde donorlyq aǵzalardyń jetispeýshiligi kezinde barlyq zamanaýı balamalar, ıaǵnı altrýıstik donorlyq, AVO-úılesimsiz jáne búırekti aıqas transplantatsııa jasaý engizilgenin habarlap otyr.
— Búırekti transplantatsııalaýdyń qajettiligi jáne gemodıalızdegi patsıentterdiń kóbeıýi jaǵdaıynda aıqas donorlyq baǵdarlamasyn keńeıtý patsıentterdiń ómirin saqtap qalý men ulttyq transplantologııany damytýdaǵy mańyzdy qadam, — deıdi mınıstrlikten.
Aıta ketsek, naýryz aıynda Shymkentte bir aptada eki búırek transplantatsııasy jasaldy.
Jyl basynda Qazaqstanda transplantatsııa jasalatyn organǵa arnalǵan apparat synaqtan ótip jatqany týraly habarlaǵan edik.
Eske salaıyq, elimizde orta eseppen alǵanda 1 mıllıon adamǵa keminde 10 transplantatsııa qajet. Osy oraıda medıtsına ǵylymynyń doktory ıÝrıı Pıa transplantatsııa tek medıtsına máselesi emes, qoǵamnyń ortaq problemasy ekenin málim etti.