Qazaqstanda alǵash ret túrmeden shyqqandardy beıimdeý ortalyǵy ashyldy
ASTANA. QazAqparat - Qaraǵandy qalasynda túrmeden shyqqan azamattardy beıimdeý ortalyǵy ashyldy. Atalǵan bastama Qazaqstanda alǵash ret qolǵa alynyp otyr, dep habarlaıdy QazAqparat tilshisi.
Qaraǵandy oblysy ákiminiń orynbasary Jandos Ábishevtiń aıtýynsha, ortalyq ashylǵaly beri mamandardyń kómegine 60 adam júgindi. Aldaǵy ýaqytta osy bastamanyń tıimdiligin eskere otyryp, taǵy eki bólimsheni ashý josparlanyp otyr. Budan bólek, arnaıy jobanyń aıasynda zańgerlik kómek qana emes, qarjylaı qoldaý da jasalady. Ol úshin jergilikti bıýdjetten 22 mıllıon teńge bólindi.
"Ótken jyly túrmeden shyqqan 132 adam orta bilim týraly attestatty aldy, taǵy 81 azamatqa negizgi bilimi bar degen kýálik berildi. Alty túzeý mekemesinde kásibı bilim berý toptary jasaqtaldy. Ol jerde 222 adam bilim alyp jatyr. Bıznesmender de ondaı adamdarǵa jumysqa turý úshin kvota bólip otyr. Osy ýaqytqa deıin 200 adam jumysqa turdy. Al bıznespen aınalysamyn deýshiler óz kásibin ashý úshin nesıe ala alady. Máselen, Osakarovka aýdanynyń bir turǵyny mal sharýashylyǵymen aınalysamyn dep, 3 mıllıon teńge kóleminde nesıe aldy", - deıdi Ábishev.
