Qazaqstanda alǵash ret tennısten Virtus álem chempıonaty ótedi

ASTANA. KAZINFORM — Astanadaǵy «Dáýlet» tennıs ortalyǵynda 3-11 mamyr aralyǵynda tennısten Virtus álem chempıonaty ótedi.

Qazaqstan tennıs federatsııasynan málim etkenindeı, ıntellektýaldyq buzýshylyǵy bar sportshylarǵa arnalǵan iri halyqaralyq jarys «Intellektýaldyq damý erekshelikteri bar adamdarǵa arnalǵan sport federatsııasy» RQB-nyń (LIN sport federatsııasy) qoldaýymen uıymdastyrylyp otyr.

Tarıhta alǵash ret atalmysh álem birinshiligi Ortalyq Azııada ótkeli tur. Virtus dodasyna 8 el: Qazaqstan, Ulybrıtanııa, Belgııa, Aýstralııa, Polsha, Italııa, Úndistan, Frantsııadan myqty sportshylar qatysady dep josparlanǵan. Jarys II1, II2 jáne II3 sanaty boıynsha jekeleı, juptyq jáne komandalyq synda ótedi.

- Bul – ınklıýzıvti sportty damytýdaǵy mańyzdy qadam. Qazaqstan Virtus álemdik qaýymdastyǵyn laıyqty qabyldaıtynyna senemiz, - dedi Virtus prezıdenti Mark Trýffo.

«Intellektýaldyq damý erekshelikteri bar adamdarǵa arnalǵan sport federatsııasy» RQB (LIN sport federatsııasy) prezıdenti Dına Temirǵalıeva Qazaqstannyń álemdik ınklıýzıvtik tennıstiń bir bóligine aınalǵanyna qýanyshty ekenin jetkizdi.

Virtus — ıntellektýaldyq buzýshylyǵy bar adamdardy damytýǵa arnalǵan jetekshi halyqaralyq uıym. Oǵan dúnıe júzi boıynsha 100-den astam elden 7 myńnan astam sportshy kiredi. Virtus aıasynda Paralımpıada oıyndaryn qosqanda, jeńil atletıka, júzý, ústel tennısi, velosport, basketbol jáne basqa sport túrlerinen jarystar ótedi.

Eske sala keteıik, budan buryn Elena Rybakınanyń komandasyna jańa bapker qosylǵanyn jazǵan bolatynbyz.