Qazaqstanda alǵash ret taekvondodan Azııa chempıonaty ótkeli jatyr
ALMATY. Mamyrdyń 17-si. QazAqparat /Erlik Erjanuly/ - Astanada mamyrdyń 20-23-i kúnderi taekvondodan (WTF) XIX Azııa chempıonaty jáne taekvondo-pýmseden (tehnıkalardy kórsetý) І Azııa chempıonaty ótedi,
dep habarlaıdy QazAqparat.
Ony QR Týrızm jáne sport mınıstrligi, Astana qalasynyń ákimdigi jáne Qazaqstannyń taekvondo federatsııasy birigip uıymdastyryp otyr. Bul sport túrinen Azııa chempıonaty Qazaqstanda alǵash ret ótpek. Oǵan 29 elden 380 sportshy qatysady dep josparlanýda. Resmı delegatsııa múshelerin qosqanda qonaqtardyń jalpy sany 500-ge jetpek. Al jarys bastalǵanǵa deıin tóreshilerdiń qatysýymen halyqaralyq semınar-konferentsııa ótkiziledi. Azııa, Amerıka, Afrıka jáne Eýropanyń 35 elinen kelgen tóreshilerdiń arasynda Qazaqstannan 6 referı (4 dan) bar. Onda teorııalyq jáne tájirıbelik dáristerge qatysýshylarǵa semınardyń sońynda resmı sertıfıkattar tapsyrylmaq. Chempıonat aıasynda sondaı-aq, Azııa taekvondo odaǵy bas assambleıasy ótkizilmek.
