Qazaqstanda alǵash ret sapa kongresi ótedi
ASTANA. QazAqparat - Azııa sapa jelisiniń XVI kongresi Almaty qalasynda uıymdastyrylady. Oǵan álemniń túkpir-túkpirinen tanymyl sapa bilgirleri keledi, dep xabarlaıdy QazAqparat tilshisi.
Qazaqstannyń sapa jáne ınnovatsııalyq menedjment uıymynyń basshysy Azat Ábdiraxmanovtyń aıtýynsha, kongreske japondyq Norıakı Kano, shvetsııalyq Klaes Berlın, professor Moxamed Zaırı, professor Van-Sen Shın syndy sapa menedjmentiniń sheberleri shaqyrylyp otyr. «Qytaıdan, Úndistannan, Sıngapýrdan, Japonııadan, Ońtústik Koreıadan biraz adam keledi. Biraq Qazaqstannan adam az tirkeldi. Aıtýǵa da uıat. Bálkim, aqparat jetpeı jatqan shyǵar. Menińshe, bizdiń kásipkerlerimiz aldaǵy kongrestiń mańyzdylyǵyn túsinbeı otyr. Qatardaǵy bir konferentsııa dep oılaıtyn shyǵar. Olaı emes. Kongreste sapa mendjmenti salasyndaǵy biraz máseleler talqylanady. Bıznesti basqarý, óndiristik protsesterdi retteý, sapaly jumysty uıymdastyrý - osynyń bárin naqty mysaldarmen kórsetiledi. Máselen, qazir Japonııa, Koreıa sııaqty memleketter sapa arqyly dúnıejúzine tanylyp otyr. Sapa menedjmentin durys uıymdastyrý arqyly qazirgi jetistikterge jetti. Sondyqtan bizge aldaǵy kongresti barynsha paıdalaný qajet, otandyq kásipkerlerge ózine qajetti barlyq aqparatty alǵan jón. Sebebi sapa salasynyń bilgirleri kúnde kele bermeıdi», - dedi A.Ábdiraxmanov Astanada ótken baspasóz máslıxatynda.
Onyń aıtýynsha, qazirdiń ózinde shetelden 140 baıandama tústi. Azııa, AQSh pen Eýropadan 200-den astam delegat tirkeldi. Olar ónim sapasy, ınnovatsııalyq menedjment, qyzmet sapasy, maman daıarlaý jáne taǵy basqa mańyzdy máseleler boıynsha baıandama jasap, osy salanyń ózekti máselelerin talqylaıdy.
«Bul - kommertsııalyq joba emes. Eshkim paıda túsireıin dep jatqan joq. Biz, kerisinshe, qarjy jaǵynan mınýsqa ketetin shyǵarmyz. Degenmen, maǵynasy jaǵynan, ózimizge beretin paıdasy jaǵynan nátıjesi kóp bolady dep oılaımyn. Azııa sapa jelisi osydan 15 jyl buryn qurylǵan. Sodan beri alǵash ret kongres Qazaqstan jerinde óteıtin dep jatyr. Endi, kezegimiz qashan keledi? Ony eshkim bilmeıdi. Sondyqtan osy sharany barynsha paıdalanýymyz qajet», - dep atap kórsetti A.Ábdiraxmanov.
Aıta keteıik, kongrestiń uıymdastyrýshylary - Qazaqstannyń sapa jáne ınnovatsııalyq menedjment uıymy, «Atameken» UKP jáne Azııa sapa jelisi. Al Qytaıdyń sapa qaýymdastyǵy, sondaı-aq, bárqatar qytaı men káris kompanııalary qarjylaı kómek berip otyr. Kongress 19-20 qyrkúıek kúnderi Almatydaǵy «Interkontınental» qonaq úıinde ótedi.
